Рамазанға 6 күн қалды: ұйқыны қалай қысқартуға болады

Қасиетті Рамазан айына санаулы күн қалды. Мұсылман қауым ораза тұтады. Ерте тұрып, ауыз бекітеді. Демек ұйқыны қысқарту керек. 

Almaty.tv тілшісі арнайы кеңес ұсынады.

Ұйқы – Алланың адам баласына берген нығметтерінің бірі. Ол – тіршіліктің заңдылығы, дене мен жанның тынығу уақыты.

«Ол сондай Алла, сендерге түнді киім, ұйқыны тынығу етіп, күндізді (кәсіпке) тарқау мезгілі қылды», –  деп жазылған Фурқан сүресі, 47-аятта.

Адам баласы түнді тынығып, күндіз еңбек етеді. Демек, ұйқы – жалқаулық емес, күш-қуат жинап, құлшылыққа дайындалудың құралы.

Ұйқының мақсаты – денені демалдыру, сергектік сыйлау және құлшылық етуге мүмкіндік беру.

Шариғатта ұйқыны мүлде азайтуға қатысты нақты бұйрық жоқ. Алайда уақытты тиімді пайдалану, көп ұйықтамау, жалқаулықтан сақтану жөнінде насихаттар айтылған. Адам ұйқысын реттей білсе, өмірінде де, руханиятында да берекеге кенеледі.

Пайғамбарымыз Мұхаммед (с.у.ғ.) және оның сахабалары аз ұйықтап, түннің бір бөлігін құлшылыққа арнайтын.

Ал ғалымдардың айтуынша, көп ұйқы жүректі өлтіреді, денеге салмақ түсіреді. Бірақ ұйқыны денсаулыққа зиян тигізетіндей дәрежеде қысқарту да дұрыс емес. Ислам – тепе-теңдік діні.

Ұйқыны қалай реттеуге болады?

• Ұйқы циклін түсіну

Адам ұйқысы шамамен 90 минуттық циклдерден тұрады. Егер 6 сағат емес, 6 сағат 15 минут ұйықтасаңыз, шаршап тұруыңыз мүмкін. Сондықтан ұйқыны 4,5 сағат, 6 сағат, 7,5 сағат сияқты циклге сай жоспарлау сергек оянуға көмектеседі.

• Тамақты мөлшермен ішу.

Асқазан асқа толған сайын адамның ұйқысы келеді. Тойып ұйықтау – денсаулыққа зиян әрі еріншектікке себеп.

• Күндіз көз іліп алу 

Пайғамбарымыз Мұхаммед (с.у.ғ.) кейде түсте аз уақыт тыныққан. 15–20 минуттық қысқа ұйқы (терең ұйқыға кетпей) кешкі сергектікке күш береді. Күндізгі ұйқы уақытын 30 минуттан асырмау керек.

• Кофеин тәртібі

Түстен кейін кофе ішпеу. Кофеин ағзада 6–8 сағат сақталады. Егер кешкі 5-те кофе ішсеңіз, түнгі ұйқы сапасы төмендейді.

• Кешке ауыр ақпараттан бас тарту

Ұйықтар алдында эмоционалды контент, ауыр жаңалық, әлеуметтік желідегі артық ақпарат ми белсенділігін арттырады. Одан гөрі оқу, зікір, тыныш музыка пайдалы.

• Уақытылы ұйықтау, ерте тұру.

Құптан намазынан кейін ерте жатқан абзал. Таң намазы мен күн шығу арасындағы уақыт – берекелі шақ. Бұл мезетте дұға тілеп, Алланы еске алған жөн.

•  Ұйқы уақытын біртіндеп қысқарту.

Кенеттен емес, баяу дағдылану арқылы адам нәпсісін тәрбиелей алады.

• Температураны бақылау

Салқындау бөлмеде (шамамен 18–21°C) ұйқы сапалы болады. Жылы бөлме – ауыр ұйқыға, жиі оянуға себеп.

• Ғибадатқа жауапкершілікпен қарау.

Құлшылығын қаза етуден қорыққан жан түнін жоспарлап, ұйқысын да реттейді.

• Ұйқы сапасын арттыру.

Ұйықтар алдында бөлмені қараңғылау, таза ауа  – сапалы демалысқа ықпал етеді.

Ұйқы – өмірдің ажырамас бөлігі. Ол – Алланың адамға берген рақымы.

Алайда оны шектен тыс көбейту де, орынсыз азайту да дұрыс емес. Ең дұрыс жол – тепе-теңдік сақтау.

Оқи отырыңыз: Рамазанға 7 күн қалды: ҚМДБ ораза кестесін жариялады