Солтүстік Қазақстанда жеті ауыл қаңырап бос қалған. Адамдар мүлдем тұрмайтын елдімекендер алдағы уақытта жабылмақ. Ал 45 ауылда халық саны 10 адамға да жетпейтін көрінеді, деп хабарлайды Аlmaty.tv тілшісі Qazaqstan Media-ке сілтеме жасап.
Мұндай деректерді бүгін облыс орталығында өткен жиында өңір жетекшісінің орынбасары Қанат Дүзелбаев келтірді. Оның айтуынша, бүгінде аймақта халық саны 50-ден аспайтын 141 ауыл бар.
Әрине, елдімекендерді дамыту үшін жұмыстар жасалып-ақ жатыр. Айталық, бір ғана «Ауыл – ел бесігі» бағдарламасы аясында биыл 59 ауылға 14 млрд теңге бөлінген. Бұл қаржы 77 жобаның жүзеге асырылуына бағытталыпты.
«Оның 7 млрд теңгесі шекарада орналасқан ауылдарды дамытуға бөлінген. Осының арқасында 1100-ден астам жұмыс орыны құрылып, 160 мыңнан астам ауыл тұрғынының өмір сүру сапасы жақсартылған. Осылайша, 2027 жылға дейін 50-ден астам ауылды жаңғыртуды көздеп отырмыз», — деді Қанат Дүзелбаев.
Оқи отырыңыз: Келесі жылдан бастап жәрдемақы, зейнетақы мен айыппұлдардың мөлшері көбейеді