Енді су шаруашылығы бойынша шешім қабылдауға қоғамның қатысуы күшейеді

Мәжіліс 1992 жылғы Шекарааралық су арналары мен халықаралық көлдерді қорғау және пайдалану жөніндегі конвенцияға Су және денсаулық проблемалары туралы хаттаманы ратификациялады, деп хабарлайды Аlmaty.tv ҚР Парламенті Мәжілісінің баспасөз қызметіне сілтеме жасап. 

Бұл – сумен қамтамасыз ету, санитария, гигиена және денсаулық сақтау мәселелеріне бағытталған әлемдегі алғашқы әрі жалғыз шарт. Оның мақсаты – су ресурстарын тұрақты басқару, сумен байланысты аурулардың таралуын болдырмау және халықтың денсаулығы мен әл-ауқатын қорғау.

Хаттамада мына міндеттер көрсетілген:

• сумен жабдықтау, санитария, гигиена және халық денсаулығы үшін нақты және өлшенетін нысаналы көрсеткіштерді белгілеу;
• сумен байланысты ауруларды қадағалау және алдын алу;
• қажетті ресурстармен қамтамасыз етілген төтенше жағдайлар кезіндегі іс-қимыл жоспарын әзірлеу;
• халықты қолданыстағы санитарлық-гигиеналық талаптарға сай келетін сумен қамтамасыз етуде ведомствоаралық ынтымақтастықты нығайту;
• су шаруашылығы қызметінің барлық кезеңінде қоғамды шешім қабылдауға тарту және халықтың хабардар болуын қамтамасыз ету;
• су ресурстарын қорғау және пайдалану, санитария және денсаулық сақтау саласындағы халықаралық ынтымақтастықты дамыту.

Хаттамаға қосылу су ресурстарын қорғау мен ұтымды пайдалануға, халықты қауіпсіз ауыз сумен қамтамасыз етуге, ағынды суларды қайта қолдануға, суды пайдаланудың барлық кезеңінде санитарлық-гигиеналық нормаларды сақтау бойынша шешімдерді жедел қабылдауға көмектеседі.

Оқи отырыңыз: Әлем сарапшылары инклюзивті қоғам құрудағы жаһандық сын-қатерлерді талқылады