Тісін емдетіп жатып көз жұмған қыздың ата-анасы дәрігерлерді жазаға тартуды талап етті

Астананың қылмыстық істер жөніндегі ауданаралық сотында тіс емханасында көз жұмған 3 жасар қыздың ісі бойынша айыпталушы дәрігер-анестезиолог Аида Жұмағалиеваға қатысты сот жарыссөзі басталды, деп хабарлайды Аlmaty.tv тілшісі Stan.kz-ке сілтеме жасап.

Көз жұмған қыздың анасы сотқа жүгініп, ешкімнің баласына әдейі зиян келтіруді мақсат етпегенін түсінетінін атап өтті.

“Біз баламызды ешкім әдейі өлтіргісі келмегенін түсінеміз. Алайда, біз бұл жерге дені сау, ойнап-күліп жүрген баламызды алып келдік, ал қазір ол жоқ. Менің ойымша, дәрігерлер де, емхана да – барлығы жауапкершілікке тартылуы тиіс. Прокурор айтқан дәрігерлік қызметпен айналысу құқығынан үш жылға айыру – баланың өлімі үшін өте аз. Бұл тым аз. Біз баламыздан айырылдық, ал бар болғаны үш жылға ғана қызметтен шеттету әділетсіз”, – деді әйел.

Әйел қызының өліміне дәрігерлерді кінәлі деп санайтынын мәлімдеді.

“Тек анестезиолог қана емес, іске қатысы бар барлық өзге тұлғалар да жауапқа тартылуы тиіс. Біздің баламыз небәрі үш жарым жаста еді. Оның болашағына қатысты үлкен жоспарларымыз болды. Енді біз қызымыз үшін жасай алатын жалғыз нәрсе – өліміне кінәлілердің жазалануына қол жеткізу. Әділ шешім қабылданады деп үміттенемін. Сот отырыстары мен тергеу барысында көп адам баланың жүрегі ауырады, пневмониясы болған және тағы басқа уәждерді айтты. Қызым дені сау бала еді, ешбір аурумен ауырмаған”, – деді ол.

Қыздың әкесі ота алдында өздері жұбайымен бірге барлық қажетті дайындық шараларын толық көлемде орындағандарын, оның ішінде жүрекке ультрадыбыстық зерттеу де жасатқандарын мәлімдеді.

“Иә, қызым қызылша және пневмониямен ауырған, мұны ешкім жасырмайды. Бірақ ол аурулармен ауырғанынан бері жеткілікті уақыт өткен еді. Егер бала пневмониямен екі-үш апта бұрын немесе тіпті бір ай бұрын ауырған болса, оны стоматологияға апармас едік. Барлық қажетті сараптамалар тапсырылды. Мен бұның бәрі үшін шамамен 22 мың теңге төледім. Тіпті талдаулардың неге мұншалықты көп екенін жұбайымнан сұрадым. Біз бәрін толықтай төлеп, барлық құжаттарды ұсындық”, – дейді қыздың әкесі. 

Қыздың әкесі анестезиолог пен дәрігердің бала наркозда болған сәтінде “қараусыз қалдырды” деп айыптайды.

Бұған дейін де Астана мен Алматы қалаларында осындай өліммен аяқталған оқиғалар болған, қызы қаза тапқаннан кейін де бірнеше ұқсас жағдай тіркелген. Ер адам олардың ішінде “Севоран” анестезиясын қолдану кезінде орын алған оқиғалар да бар екенін атап өтті.

“Алдағы уақытта мұндай қайғылы жағдайлардың алдын алу үшін соттан тиісті жеке қаулы немесе Денсаулық сақтау министрлігіне жолданатын ресми өтініш қабылдауды өтінемін. Бізбен байланысқа шыққан көптеген ата-аналар мұндай анестезиядан кейін олардың балаларының мінез-құлқы, жүріс-тұрысы мен психологиялық жағдайы өзгергенін айтты. Мұны да елеусіз қалдыруға болмайды. Не тіс емханаларындағы анестезиологиялық қызметтердің агрессивті жарнамасына тыйым салу қажет, не болмаса Денсаулық сақтау министрлігі мұндай араласуларды уақыт бойынша, көрсетілімдері мен өткізу шарттары тұрғысынан нақты әрі қатаң регламенттеуі тиіс”, – деді ол.

Сот отырысында аталмыш іс бойынша күдікті деп танылған анестезиолог соңғы сөзін сөйледі.

Сотталушы өз кінәсін мойындамайтынын мәлімдеп, істі тергеу әрекеттері салғырттықпен жүргізілгенін атап өтті.

“Сотқа дейінгі және сот барысындағы тергеу әрекеттері тиісінше жүргізілмеді. Мен сілтеме жасай алатын заттай дәлел жоғалып кетті. Тергеу кезеңінде біздің өтініштеріміз ескерусіз қалдырылды. Менің бақылауымнан тыс болған жайттар үшін жауапкершілік маған жүктелді. Мен мұны әділетсіз деп санаймын. Көптеген фактілер, менің ойымша, сот талқылауы барысында анықталды және оларды комиссия оңай жоққа шығара алады. Осыны ескерулеріңізді сұраймын. Тағы да қайталап айтамын: мен өз кінәмді мойындамаймын және кінәсіз екенімді алдағы уақытта да дәлелдей беретін боламын”, – деді Аида Жұмағалиева.

Судья іс бойынша үкімнің 22 желтоқсанда сағат 16:00-де жариялатынын хабарлады.

Айта кетейік, бүгінгі сот отырысында прокурор қыздың өліміне қатысты іс бойынша күдікті деп танылған анестезиологты жазадан босатуды сұраған еді. 

Дәл осы іс бойынша 25 қарашада өткен сотта 3,5 жастағы Зере Есентайға көрсетілген емдеу сәті түсірілген кадрлар көрсетілген еді. Прокурор Еркебұлан Шалқаров сотта сарапшылардың қорытындысына сәйкес балаға тіс емдеу толық алдын ала тексерусіз жүргізілгенін мәлімдеді. Анестезиолог кінәлі деп танылса, оған үш жылға дейін бас бостандығынан айыру жазасы тағайындалуы мүмкін.

Еске салсақ, бұған дейін Астанада 3 жасар қыз тіс емдетіп жатып көз жұмған болатын. 

Оқи отырыңыз: Наркоз алуына болмайды: Педиатр үш жастағы қыздың өліміне қатысты мәлімдеме жасады