Вакцинация балаларды жұқпалы аурулардың ауыр асқынуынан қорғайды

Екпе алмаған балалар жұқпалы ауруларды ауыр өткеруі мүмкін. Кей жағдайда ауру пневмонияға, есту қабілетінің төмендеуіне, тіпті құрысуға әкеледі. Бұл туралы Денсаулық сақтау министрлігі ескертті, деп хабарлайды Almaty.tv.

Министрлік мәліметінше, дәрігерлер тәжірибесінде екпе алмаған балалар арасында отиттің, соның ішінде есту қабілетінен айырылуға әкелетін жағдайлардың кездесетіні байқалады. Сондай-ақ жұқпалы аурулар пневмония және басқа да ауыр асқынуларға себеп болуы мүмкін.

Мәселен, пневмококк инфекциясына қарсы вакцина осы бактерия қоздыратын аурулардан, соның ішінде пневмония мен менингиттен қорғануға көмектеседі.

«Өз тәжірибемде екпе алмаған балалар арасында отит, соның ішінде есту қабілетінен айырылуға әкелген жағдайлар, сондай-ақ пневмония кездеседі. Кейде жұқпалы аурулар құрысу синдромымен қатар жүреді», – дейді дәрігер маман.

Ауруды өткергеннен кейін ағзада иммунитет қалыптасуы мүмкін. Алайда инфекцияны екпесіз жұқтыру ауыр асқынуларға әкелуі ықтимал.

Сондықтан дәрігерлер балаларға ұлттық профилактикалық екпелер күнтізбесіне сәйкес вакцина салдыруға кеңес береді.

Баланың дене қызуы көтеріліп, қатты әлсіресе немесе басқа да алаңдатарлық белгілер байқалса, медициналық көмекке жүгіну қажет. Мамандар өз бетінше ем қолданбауға шақырады.

Оқи отырыңыз: Суды дұрыс ішу ережелері қандай