Қазақстанның оңтүстік бөлігінде ауа температурасы 20 градусқа дейін көтеріледі

Синоптиктер 12-14 наурыз күндеріне арналған ауа райы болжамын жария етті, деп хабарлайды Аlmaty.tv тілшісі. 

Синоптиктердің мәліметінше, алдағы уақытта ауа температурасы жоғарылайды.

«Республиканың басым бөлігінде жауын-шашынсыз ауа райы сақталады. Ауа температурасы кей өңірлерде 0…+8 градусты көрсетеді. Ал оңтүстік және оңтүстік-шығыста +12…+20 градусқа дейін көтеріледі. Бұл климаттық нормадан 4…10 градусқа жоғары», - делінген Қазгидромет хабарламасында.

Сондай-ақ еліміздің батыс және шет солтүстік аймақтарында, Ресейдің Еуропалық бөлігінен жылжитын атмосфералық фронттардың ықпалынан, жауын-шашын, тұман және көктайғақ болады.