Қазақстан мен Түрікменстан көлік саласында қолайлы тариф енгізеді

ҚР Көлік вице-министрі Талғат Ластаев және Түрікменстан министрлер кабинеті жанындағы Көлік және коммуникация агенттігі бас директорының орынбасары Батыр Аннаевтың тең төрағалығымен көлік, транзит және логистиканы дамыту мәселелері жөніндегі жұмыс тобының 1-отырысы өтті, деп хабарлайды Аlmaty.tv тілшісі zakon.kz-ке сілтеме жасап.

Жұмыс тобының отырысы шеңберінде көлік, транзит және логистика саласындағы ынтымақтастық мәселесі талқыланды. Сонымен қатар отырыс қорытындысы бойынша ҚР Көлік министрлігі мен Түрікменстан министрлер кабинеті жанындағы Көлік және коммуникациялар агенттігі арасында көлік саласындағы өзара байланыс туралы Меморандумға қол қойылды.

Меморандум екі ел арасындағы теміржол және теңіз көлігі саласындағы ынтымақтастықты кеңейтуді көздейді. Атап айтқанда, қолайлы тарифтік жағдайлар жасау, инфрақұрылымды дамытуды үндестіру, өзара ақпаратпен алмасу үшін цифрлық шешімдерді енгізу жөнінде бірлескен шаралар қабылдауды қоса алғанда, екі елдің аумақтары бойынша тасымалдау көлемін арттыру мәселелері қамтылатын болады.

"Сонымен қатар жұмыс тобының отырысы барысында тараптар "Қытай – Қазақстан – Түрікменстан – Иран" дәлізін бірлесіп дамыту туралы уағдаласты. Екі тарап сонымен бірге "Солтүстік-Оңтүстік" дәлізі транзиттік және экспорттық жүктер ағымының маңызды бағыттарының бірі болып табылатынын атап өтті. Айта кетерлігі, жалпы осы жылдың 10 айының қорытындысы бойынша аталған дәліз бойынша жүктерді тасымалдау көлемі 15% өсіп,  1,7 млн тоннаны құрады", - делінген көлік министрлігінің хабарламасында.

Күн тәртібіне сәйкес тараптармен теміржол қатынасы саласында икемді бәсекеге қабілетті тарифтік саясатты қалыптастыру мәселесі көтеріп, бұл бағытта атқарылған жұмыстың оң нәтижелері сөз болды. Кездесу соңында екі ел арасындағы көлік, транзит және логистика саласындағы өзара ынтымақтастықты одан әрі дамытудың маңыздылығы ерекше аталып өтті.

Оқи отырыңыз:Алматыда жастарды жұмысқа орналастыру үшін бірыңғай платформа құрылды