|
Саясат
16.07.2019 | 14:56

Алматы облысындағы екі ауданның әкімі ауысты

Алматы облысындағы екі ауданның әкімі ауысты Фото Tengrinews.kz

Алматы облысы әкімінің бұйрығымен Қаратал және Ескелді аудандарының әкімдері тағайындалды, деп хабарлайды Tengrinews.kz.  

Президент Әкімшілігінің келісімімен және мәслихат депутаттарының қолдауымен Қайрат Найманбайұлы Бұлдыбаев  Қаратал ауданының әкімі болып тағайындалды. Бұрын ол Талдықорған қалалық мәслихатының хатшысы қызметін атқарған.

Ал, Рауан Рақымбеков болса, Ескелді ауданының әкімі болып тағайындалды.  

«Кеше Президент Қасым-Жомарт Тоқаевтың төрағалығымен Үкіметтің кеңейтілген отырысы өтті. Біз тапсырма алдық, бізге жауапкершілік жүктелді және артқан сенімді ақтауымыз керек. Ең алдымен біз елдің әлеуметтік саясатын іске асыруды қамтамасыз етуге тиіспіз. Инвесторлармен жұмыс істеу және халықтың өмір сүру сапасын жақсарту. Бүгінгі кадрлық өзгерістер өңірлерде кездейсоқ емес. Ескелді және Қаратал аудандары аграрлық аймақтар болып табылады. Сіздердің алдыңызда егіннің сапасын жақсарту және ауыл шаруашылығын жаңғырту міндеті тұр», – деді облыс әкімі Амандық Баталов.

Сонымен қатар, аймақ басшысы Ескелді ауданының бұрынғы әкімі Бағлан Таңекенов тұрғын үй-коммуналдық шаруашылық басқармасының басшысы лауазымына тағайындалғанын атап өтті.


МАҚАЛАДА

назначения