Былтырдан бастап заңсыз шығарылған 857 млрд теңге елімізге қайтарылды. Бұл туралы ҚР Сыбайлас жемқорлыққа қарсы іс-қимыл агенттігінің сотқа дейінгі тергеп-тексеру қызметінің басшысы Қанат Cүлейменов айтты, деп хабарлайды Almaty.tv тілшісі ҚазАқпаратқа сілтеме жасап.
«Сыбайлас жемқорлыққа қарсы қызмет былтырдан бастап қазірге дейін 857 млрд теңге қайтарды. Бұл сомада шетелден қайтарылған қаражат пен жылжымайтын мүлік те қамтылып отыр. Мәселен, ӨКМ Операторы ісі бойынша үкім шыққан болатын және оның аясында 180 млрд теңге қайтарылды. Бұл қаражаттың бір бөлігі жеңілдікпен автонесие беруге бағытталған еді. Жалпы, қайтарылған қаржы еліміздегі әлеуметтік саладағы мәселелерді шешуге жұмсалады», - деді Қанат Сүлейменов Amanat партиясында өткен баспасөз мәслихатында.
Сонымен қатар ол жыл соңына дейін қанша актив қайтарылуы мүмкін екенін айтты.
«Биылғы жылдың аяғына дейін тағы 180 млрд теңге қайтару жоспарланған. Бұл қаражат сомасына шетелдегі ақша мен жылжымайтын мүлік, қымбат көліктер кіріп отыр. Қазір бұл істер тергеліп жатыр», - деді агенттік өкілі.
Бұдан бұрын Қаржылық мониторинг агенттігінің төрағасы Жанат Элиманов жыл басынан бері мемлекетке жалпы сомасы 217 млрд теңге болатын активтер қайтарылғанын айтқан еді.
