Еуразиялық экономикалық одақты дамытудың жаңа стратегиясын әзірлеу қажеттілігі жоқ

Еуразиялық экономикалық одақты дамытудың жаңа стратегиясын әзірлеу қажеттілігі жоқ. Бұл туралы Бішкекте өтіп жатқан Жоғары Еуразиялық экономикалық кеңес отырысында ҚР Президенті Қасым-Жомарт Тоқаев айтты, деп хабарлайды Almaty.tv.

«2020 жылы Еуразиялық экономикалық интеграцияның 2025 жылға дейінгі даму стратегиясын қабылдадық. Бүгінде ЕАЭО-ға мүше елдердің үкіметтері Комиссиямен бірлесіп, оны жүзеге асырып келеді. Әрине, бұл процесс бастапқыда ойлағандай тез жүріп жатқан жоқ. Мұның объективті себептері бар. Жекелеген мәселелер Тараптар үшін өте өзекті»,- деді Мемлекет басшысы.

ҚР Президенті прагматизм және әрбір қадамның жан-жақты пысықталуы жоспарланған мерзімде жүзеге асыруға деген ұмтылыстан басым болуы керектігін атап өтті.

«Стратегияны барлық мүше мемлекеттердің ұлттық мүддесін толық ескере отырып, кезең-кезеңімен жүзеге асыру – ең дұрыс тәсіл. ЕАЭО-ны дамытудың жаңа стратегиясын әзірлеудің қажеттілі жоқ деп есептейміз. Мұның үстіне ұлттық үкіметтердің құқықтарын шектеу қажеттілігі де жоқ», - деді Қасым-Жомарт Тоқаев.