Қостанайдағы қару-жарақ дүкенінде болған өрттен екі адам қайтыс болды

Қостанай қаласындағы қару-жарақ дүкенінде болған өртті сөндіру барысында 50% дене күйігін алған дүкен директоры ауыр халде қалалық ауруханаға жатқызылды. Сондай-ақ үйінділердің астынан екі ер адамның денесі табылды, олардың жеке басы анықталып жатыр, деп хабарлайды Almaty.tv тілшісі ҚР ТЖМ баспасөз қызметіне сілтеме жасап.

Бұған дейін өрт салдарынан 1 адам қаза болғандығы туралы хабарланған болатын. Алайда тексеру барысында табылған мәйіттің саны екіге жетті.

3 қыркүйек күні сағат 11:20-да Назарбаев даңғылындағы «Оружейная палата» дүкенінде өрт шыққаны және оның «ЮГ» КЖС-ге, автобөлшектер дүкенінің ғимаратына, асханаға таралғаны белгілі. Өрт 8 жеке тұрғын үйге таралып, оның ішінде екі қабатты үш коттедж бен сарай өртенді, сондай-ақ 6 автокөлікке зақым келді. Өрттің жалпы ауданы 2500 шаршы метрді құрады.

Оқ-дәрілердің жарылуына байланысты қару-жарақ дүкенінің жертөлесіне кіру қиынға соқты. Зардап шеккендерді тексеру үшін жеке құрам броньды кеудешелермен және қалқандармен жарақталды. Өрт 14:29-да ауыздықталып, 18:42-де жойылды.

Өртті сөндіруге ТЖД жеке құрамының 48 адамы мен 16 бірлік техникасы, ЖАО жеке құрамының 6 адамы мен 5 бірлік техникасы, Жедел-құтқару жасағы жеке құрамының 9 адамы мен 2 бірлік техникасы, ҚТЖ жеке құрамының 4 адамы мен 1 бірлік техникасы, ІІМ жеке құрамының 12 адамы мен 6 бірлік техникасы, сондай-ақ 103 қызметінің 6 адамы және 3 бірлік техникасы қатысты.