Қостанайда жол апатынан полиция қызметкері қайтыс болды

Қостанай облысында полиция қызметкері жол апатынан қайтыс болды, деп хабарлайды zakon.kz аймақтағы Полиция департаментіне сілтеме жасап.

18 желтоқсанда сағат 10:28 шамасында Әулиекөл ауданының полиция бөлімшесінің кезекші бөлімінің «102» телефонына «Қостанай-Әулиекөл-Сурган» тасжолында Октябрьское ауылына бұрылыста жүк көлігі мен «Audi» соқтығысқаны, зардап шеккендер бар екендігі туралы шұғыл хабарлама келіп түсті, - делінген хабарламада.

Оқиға орнына дереу жеткен жедел-тергеу тобы жол апаты кезінде бір көліктің жолаушысы - Әулиекөл полиция бөлімінің 32 жастағы қызметкері қайтыс болғанын анықтады. Оқиға орнын жіті тексерген мамандар шетелдік көліктің жүргізушісі ауа-райының бұзылуына байланысты рөлді басқара алмай, қарсы беттегі жолға ұшып кеткенін айтты.

Тергеуші қызметтік міндетін атқарып, бір іс бойынша сараптама тағайындау үшін Қостанайға бара жатқан болып шықты.

Полицияның мәліметінше, апат кезінде «Audi» көлігінің 29 жастағы жүргізушісі де зардап шегіп, қатты жарақат алған, сараптама оның алкоголь тұтынбағанын көрсетті. Оның жағдайы ауыр. 57 жастағы жүк көлігінің жүргізушісі зардап шеккен жоқ.

Қазіргі уақытта Қостанай облыстық ішкі қауіпсіздік дирекциясы апатқа қатысты қызметтік тергеу жүргізіп жатыр.