Бейсен Құранбектің әлеуметтік желідегі соңғы жазбасы

Бейсен Құранбектің әлеуметтік желідегі соңғы жазбасы 2019 жылдың 9 желтоқсанында жарияланған. Туған күнімен құттықтаған барша қауымға алғыс айта отырып, денсаулықтың қадірін білуге, адамдардың бір-бірін шын көңілмен құрметтей білуге шақырған, деп хабарлайды Almaty.tv.  

«Білу – бөлек, түсіну – басқа.

Жыл басынан бергі ішкі арпалысқа толы күндерімде, ұйқысыз түндерімде үш нәрсені тереңірек түсіндім...

Бірінші,

Ұстазым жиі айтатын «бұл өмірде ақшадан да, биліктен де құдіретті дүние бар. Ол – ниеттің, тілектің, батаның күші» деген сөздің рас екенін.

Екінші, халқымыздың "басты байлық – денсаулық" деп бір ауыз сөзбен айта салған даналығына бас идім. Ұйқы тыныш, тәбетің жақсы боп, ертеңгісін еш жерің ауырмай оянудың өзі жарты бақыт екенін ұқтым.

Үшіншіден, бабаларымыз қалдырған «Байлық – қолға ұстаған мұз, Бақыт –  басқа қонған құс, Бала – артта қалар із, бұл өмірдің қызығы – Сіз бен Біз» деген сөзінің тұтас өмірлік философия екенін, өмірдің мәні де, сәні де сыйластықта екенін әр клеткаммен сезіндім.

Менің ешқандай “заслугам” жоқ туған күнімде ақжарма тілегін ақтарған баршаңызға мың қайтара алғыс айта отырып, бір-біріміздің тілеуімізді тілеп, денсаулықтың қадірін біліп, бір-бірімізді шын көңілмен құрметтей білейікші дегім келеді.

Бар болыңыздар!», – делінген соңғы жазбасында.

Соңғы жылдары журналистің ауыр сырқатқа шалдыққаны хабарланған. Марқұм өмірінің ақырғы күндерін Талдықорғандағы үйінде өткізген.

Еске сала кетейік, 18 мамыр күні белгілі журналист Бейсен Құранбек 49 жасында дүниеден өтті.