СҚО-да ауыл тұрғыны итті балталап өлтірген

Солтүстік Қазақстан облысында ауыл тұрғыны бөтен ауладан шынжырда тұрған итті ұрлап кетіп, еті үшін аяусыз балталап өлтірген. Кейін ол учаскелік полиция инспекторына бағынбай, қарсылық көрсетті, деп хабарлайды Almaty.tv тілшісі Tengrinews.kz-ке сілтеме жасап.

Ауыл тұрғынының бұл қатыгез әрекеті желі қолданушылары наразылығын тудырды. Түнде ол біреудің ауласынан ит ұрлап кетіп, терісін сыпырып алған. Бұл туралы иттің иесі "СҚО фаунасы" жануарларға көмек көрсету ұйымына хабарлаған. Оның айтуынша, қараңғы түскенде үш жас жігіт ауласына рұқсатсыз кіріп кеткен.

«Олар итті балтамен ұрды, ол шамасы келгенше қарсыласты... Иттің бойынан әлі кеткенде, сүйреп алып кетті. Терісін сыпырып тастапты»,– деп хабарлады "СҚО фаунасы" жануарларға көмек ұйымы өкілдері.

Ұсталған кезде бәрі қарсылық көрсеткен. Олардың бірі қамауға алынды.

«Учаскелік полиция инспекторына бағынбау дерегі бойынша әкімшілік материал жиналып, 8 ақпанда сотта қаралды. ҚР ӘҚБтК-нің 667-бабына сәйкес Тоқшын ауылының тұрғынына 5 тәулікке әкімшілік қамауға алу жазасы тағайындалды»,– деп хабарлады СҚО ПД баспасөз қызметі өкілдері.

Полиция мәліметіне сүйенсек, ол шынжырдағы итті жеке мақсатына пайдалану үшін ұрлаған.

«Іс ҚР ҚК-нің 188-бабы, 1-бөлігі "ұрлық" дерегі бойынша сотқа дейінгі тергеу тізіміне тіркелді. Осы қылмысты жасады деген күдікпен бұрын сотталған 2001 жылғы ауыл тұрғыны ұсталды»,– деп хабарлайды СҚО ПД.

Қазіргі уақытта іс бойынша қажетті тергеу жұмыстары жүріп жатыр. Оның нәтижесі бойынша шешім шығады. Күдікті қолданыстағы заңнамаға сәйкес жазаланады. Ол ешқайда кетпейтіні туралы қолхат берді.