Алматыда әйелін соққыға жыққан музыкант қамауға алынды

Әйелін соққыға жыққан музыкант Бауыржан Әшіғалиев уақытша ұстау абақтысына қамалды.

«Жуырда оған қатысты сотқа дейінгі тергеу кезеңінде бұлтартпау шарасы қолданылады», - деп хабарлады Алматы қалалық Полиция департаменті баспасөз қызметі.

Полиция Қылмыстық кодекстің 126-бабы екінші бөлімі (Заңсыз бас бостандығынан айыру) бойынша сотқа дейінгі тергеу амалдарын жүргізіп жатыр. Күдіктінің кінәсі дәлелденсе, бес жылға дейін сотталуы мүмкін.

Еске сала кетсек, әнші Ксения Әшіғалиева  күйеуі Бауыржан Әшіғалиевті ұрлап, өлтірмек болды деп айыптаған болатын. Бұл туралы «НеМолчиКZ» қоры әлеуметтік желіде жариялады.

Ксенияның айтуынша, оған бейтаныс әйел хабарласып, баласына вокалдан сабақ беруін өтініпті. Әнші әйел айтқан мекенжайға келсе, подъезде күйеуі мен оның досы Ксенияға тап беріп, басына пакет кигізіп, ұрып-соғып, жертөлеге сүйрей жөнелген.

Бауыржан Әшіғалиев Sputnik Қазақстан тілшісімен телефон арқылы сөйлескенде, әйелін соққыға жықпағанын айтқан. Оның айтуынша, Ксения өзін-өзі жарақаттаған. Музыкант әйелінің психикалық ауруға шалдыққанын атап өтті.