Оқушы өлімі: Қызылорда облысындағы оқиғаға сыныптасы күдікті деп танылды

Қызылорда облысында тоғызыншы сынып оқушысы қаза тапты. Бейресми мәліметке сүйенсек, қайғылы жағдайға жоғары сынып оқушыларының төбелесі себеп болуы мүмкін, деп хабарлайды Almaty.tv.

Оқиға кеше сағат 14:00-де қала іргесіндегі Белкөл кентінде болған. Мектеп оқушысының денесі көпқабатты тұрғын үйдің кіреберісінен табылыпты. Тұрғындардың сөзінше, екі оқушы сөзге келіп, бірін-бірі соққыға жыққан көрінеді. Ал ақпар түсе салып, аумақты қоршаған тәртіп сақшылары аталған фактінің мән-жайын анықтауға кіріскен. Тергеу құпиялығына байланысты өзге ақпарат әзірге жария етілмейді.  

– 12 ақпанда Қызылорда қаласы Белкөл кентіндегі медициналық мекемеге кәмелеттік жасқа толмаған жасөспірімнің мәйіті жеткізілген. Аталған дерек бойынша тергеу басталып, тиісті сараптамалар тағайындалды. Оқиғаның мән-жайлары анықталуда. Тергеу барысы Қызылорда облыстық полиция департаментімен бақылауға алынды, – деді Қызылорда ОПД бастығының орынбасары Амангелді Досжанов.    

Бүгін түстен кейін аталған іске қатысты 10-сынып оқушысы күдікті деп танылды. Қазір жасөспірім қамауда отыр. Сондай-ақ балалардың тәрбиесіне немқұрайлы қараған мектеп директоры мен оның орынбасары жұмыстан босатылып үлгерді.

Айта кетейік, Қызылорда облысында биыл екі оқушы көз жұмды.

– Оқиғаға күдікті деп танылған жалғызбасты ананың баласы екені анықталып отыр. Балалар мектептен сағат 14:00-де сабақ аяқталғаннан кейін шыққан. Төрт бала болған, қасындағы 3 бала көтеріп жеткізген. Алғашқы медициналық көмек көрсетіп жатқанда бала үзіліп кетті, – деді облыстық Білім басқармасының басшысы Асқарбек Есжанов.