Нұр-Сұлтанда карантин кезінде түнгі клубта 500-ге жуық адам болған

Елордалық полиция қызметі карантин режимін бұзған мейрамханалар мен түнгі клубтарды анықтады, деп хабарлайды Almaty.tv тілшісі ҚазАқпаратқа сілтеме жасап.

«Карантин режимін бұзғандарды анықтау бойынша тексеру шараларын жүргізу барысында мобильді топ сағат 23.37-де «БХБ» түнгі клубын анықтады. Полицейлер келгенде мекемеде 500-ге жуық адам болған. Клиенттер мен қызметкерлер назардан тыс қалу үшін ғимаратты іштен жауып алған және клубта ешкім маска тақпаған, әлеуметтік қашықтықты сақтамаған», – деп хабарлады қалалық Полиция департаментінің баспасөз қызметі.

Тағы бір құқықбұзушылық сағат 22.10-да Қорғалжын тас жолы бойындағы «ZIMA» түнгі клубын тексеру кезінде анықталды. Бұл мекемеде 80 адам болған. Сондай-ақ, «ZOLOTO» мейрамханасын, «ICON» клубын және «Korean һоиѕе» мейрамханасын тексеру кезінде карантин талаптарын бұзу фактілері анықталды.

«Аталған элиталық мекемелер Нұр-Сұлтан қаласында қоғамдық тамақтану нысандары жұмысын шектеу және карантин шараларын қатаңдату қаулысын, жұмыс және демалыс күндері сағат 9:00-ден 22:00-ге дейінгі жұмыс кестесі мен санитариялық-профилактикалық шараларды анық бұзған. Мекеме иелеріне қатысты жиналған материал Тауарлар мен қызметтердің сапасы мен қауіпсіздігін бақылау басқармасына жіберілді», – дейді департамент өкілдері.

Мобильді топ бір тәулікте 313 кәсіпкерлік нысанын тексеріп, 46 карантин режимін бұзу фактісін анықтады.

«Нұр-Сұлтан қаласының Полиция департаменті азаматтар мен мекеме иелеріне карантин режимі жалғасып жатқанын және бас санитарлық дәрігер қаулысындағы талаптарды сақтау керектігін ескертеді. Тәртіп бұзушылар қолданыстағы заңнамаға сәйкес жауапқа тартылады», – деп ескертті полиция департаментінен.