Ақтөбе облысында құдыққа құлаған сәбидің жағдайы бірқалыпты

Ақтөбе облысында 1,5 жасар сәби құдыққа құлап кетті. Оқиға Мәртөк ауданы Жайсаң ауылындағы жер үйдің ауласында болған, деп хабарлайды Almaty.tv.

Тереңдігі 4 метрлік құдыққа түскен сәбиді әкесінің досы аман алып шығыпты. Есімі – Данияр. Оның айтуынша, бүлдіршін құлаған жердің беті жабық болғанымен, құдық айналасы опырылып ашық жатқан. Сол ойық арқылы төменге арқанмен түсіп, суға бата жаздаған баланы қараңғы жерден алып шыққан. Ең бастысы – қазір сәбидің жағдайы бірқалыпты.  

«Құдыққа түсу үшін дене бітімі арықтау адам қажет болды. Сондықтан досымды көмекке шақырдым. Бар шаруасын тастап Жайсаңға келді. Қызымды аман алып қалды. Алғысым шексіз», – деді баланың әкесі Медет Қарағұлов.