Алматыда ПТР сынамаларын заңсыз сатпақ болғандар анықталды

Алматыда COVID-19 инфекциясын анықтайтын ПТР сынамаларын заңсыз сатпақ болғандар анықталды, деп хабарлайды Almaty.tv.

Қалалық экономикалық тергеу департаменті жүргізген жедел іздестіру шарасы кезінде ұсталғандар жалпы құны 33 миллион теңгеге бағаланған 7000 ПТР тестілерді саудаламақ болған. Сондай-ақ, департаменттің хабарлауынша, тексеру кезінде Қытайда шығарылған тағы 2225 ПТР сынақтары қосымша анықталып, тәркіленді. 

Қазір сотқа дейінгі тергеу жұмыстары жүргізілуде. Іс Қазақстан Республикасы Қылмыстық кодексінің 214-бабының 1-тармағы, яғни «заңсыз кәсіпкерлік» бабы бойынша қаралуда. Айта кету керек, COVID-19 инфекциясын анықтайтын ПТР тесттерді арнайы орындарда ғана тапсыру қажет.