Ақмола облысы Астрахань ауданындағы жантүршігерлік жол апатынан зардап шеккендердің бірі Нұр-Сұлтандағы қалалық ауруханаға жеткізілген. Аудандық ауруханада жатқан басқа науқастардың жағдайы бірқалыпты ауыр және қанағаттанарлық. Бұл туралы Instagram парақшасында өңір басшысының орынбасары Марат Иғали айтты, деп хабарлайды Sputnik Қазақстан.
Иғали хабарлағандай, үш көлік соқтығысқан жол апатынан зардап шеккендердің жағдайын білуге Ақмола облысының әкімі Ермек Маржықпаевтың тапсырмасымен Астрахань ауданы әкімінің міндетін атқарушы Жанар Шахпутова барыпты.
«Қазір зардап шеккендердің бірі Нұр-Сұлтандағы қалалық ауруханаға жатқызылған. Жағдайы бірқалыпты ауыр. Тағы бір науқас аудандық ауруханада жатыр, жағдайы бірқалыпты ауыр, ол тасымалдауға болмайтын халде. Тағы бір әйелге ота жасалды», - деді облыс әкімінің орынбасары Марат Иғали.
Иғалидің парақшасындағы шағын видеороликте дәрігер ота жасалған әйелдің табан буыны шығып кеткенін айтты. Науқастың жағдайы қанағаттанарлық. Әрі қарай травматология бөлімінде қаралып, ем алу үшін оны да елордалық ауруханаға жөнелтпек.
«Екі баласы туыстарымен Нұр-Сұлтанға кетті. Апаттан зардап шеккендердің бәріне тиісті көмек көрсетіліп жатыр. Қаза тапқандардың туыстары мен жақындарына көңіл айтамыз», - деп жазды Иғали.
Видеороликте дәрігер тағы бір қыздың жағдайы қанағаттанарлық екенін айтты. Жарақатын тігіп берген соң науқас үйіне жіберіліпті.
Еске сала кетейік, 8 шілде күні Ақмола облысы Астрахань ауданы Ягодное ауылына жақын жерде Алматы – Екатеринбург тас жолында жантүршігерлік жол апаты болды.
Тас жолда үш жеңіл көлік соқтығысып, апаттан алты адам көз жұмды. Тағы алты адам ауруханаға жеткізілді.
Полиция хабарлағандай, ҚР ҚК 345-бабы, 3-бөлімі (Жол жүру немесе көлікті пайдалану ережелерін көлік жүргізушісінің бұзуы) бойынша сотқа дейінгі тергеу басталды. Бұл бап бойынша айыпталушы бес жылға дейін бас бостандығынан айырылып, белгілі бір қызметті атқару құқығынан өмір бойына айырылуы немесе белгілі бір қызметті атқаруға бес жылға дейін тыйым салынуы мүмкін.
Сот-медициналық сараптамалар тағайындалған.
