Иорданияда әйелдер күресінен Қазақстан спортшылары қола медаль ұтты

Иорданияның Амман қаласында өтіп жатқан күрес түрлерінен 17 жасқа дейінгі жастар арасындағы әлем біріншілігінде Қазақстан қоржыны екі қола медальмен толықты, деп хабарлайды Almaty.tv тілшісі Azattyq Rýhy агенттігіне сілтеме жасап.

Әйелдер күресінен 57 келіге дейінгі салмақта Анна Стратан қола медаль жеңіп алды. Стратан кіші финалда грекиялық Мэйри Маниден 5:1 есебімен басым түсті.

65 келі салмақ дәрежесінде Ұлдана Тілеухан үздік үштікке енді. Қола медаль үшін өткен белдесуде Ұлдана атлет Анастасия Команаваны 17:2 есебімен жеңді.

Айта кетейік, бұған дейін грек-рим күресінің өкілдері 2 күміс медаль олжалаған.