Алматыда таэквондо федерациясының 30 жылдығы мен Дихан Ахаевтың 70 жылдығына орай жасөспірімдер арасында республикалық ашық біріншілік өтті, деп хабарлайды Almaty.tv тілшісі.
Чемпионатқа еліміздің бірқатар өңірінен 30 команда қатысып, 700-ге жуық жас спортшы сайысқа түсті. Шараның ашылуында ұйымдастырушылар таэквондоның дамуына үлес қосқан жандарды марапаттап, шығыс жекпе-жегінің әдіс-тәсілдерін көрсетті.
«Бұл спорттық іс-шарада біздің жастарымыз шынығады. Ертең солардың арасынан еліміздің, Азияның, Халықаралық чемпиондар шығады. Біздің көк байрағымызды үлкен жарыстарда желбіретеді деген сенімдемін», – деді Таэквондо федерациясының президенті Бақтияр Өнербаев.
Ұйымдастырушылар Алматыда таэквондо спортының жақсы дамып келе жатқанын айтады. Шығыс жекпе-жек өнеріне ұлдардан бөлек, қыз балалар арасында да қызығушылық жоғары екен.
«Нәтижелері жақсы. Көрсеткіштері мықты. Таэквондоны 2 жыл бұрынғымен салыстырғанда үлкен өзгеріс бар», – деді Мамандандырылған жоғары спорт шеберлігі мектебінің директоры Сағат Сырлыбаев.
