Астана-Челси: көптен күткен байрақты бәсекеге санаулы уақыт қалды

Алматы Орталық стадионында көптен күткен байрақты бәсеке өткелі жатыр. Конференция лигасының аясында "Астана" өз алаңында тұңғыш рет "Челси" клубын қабылдамақ. Ойынға шет елдерден мыңдаған жанкүйер келеді. Ал билеттердің көп бөлігі сатылып да кеткен, деп хабарлайды Almaty.tv.

Бүгін тарихи күн десек артық айтпаймыз. Алматы Орталық стадионында өтетін "Астана" мен "Челси" арасындағы кездесу бірер уақыттан соң басталады. Қызығы, күннің суығына қарамастан мұнда жиналған кісі қарасы қалың. Барлығы тартысты матчты көру үшін келген. Стадионның іші де сырты жанкүйерлерге лық толы. Бастысы футбол сүйер қауымның қуанышында шек жоқ. Біз де олардың ойын тыңдап, көңіл-күйін сұрап көрген едік.

"Бұл – үлкен той, футбол тойы. Жанкүйерміз, жақсы ойын болсын", – деді астаналық жанкүйер Бекзат Кенжебеков.

"Досыммен бір ай бұрын дайындалып, келдік. Сағат 7:00-де жеттік. Түнімен жол жүріп, ұйықтаған жоқпыз", – деді  Қырғыстандық жанкүйер.

"Көңіл күй керемет. Отандық клубқа жанкүйер боламыз. Еуропаның мықты командасы келіп жатыр. "Астана" жеңісіне сенеміз, бұйырса!"– деді ақтаулық жанкүйер Уәли Мәліков.

"Өте керемет ойын болады деп сенемін. Бәсекелестік жоғары деңгейде. Алматы маған ұнады. Адамдары жарқын. Жақсы ойын болады", – деді лондондық жанкүйер Стюард Рассел.

Конференция лигасы УЕФА ұйымдастыратын турнирлердің ішінде маңыздылығы жағынан УЕФА чемпиондар лигасы мен УЕФА Европа лигасынан кейін 3-орында тұр. Оған қатысатын командалар болса, бір-бірінен өтеді. Ал "Астана" клубы – Еуропалық жарыстың негізгі кезеңіне өткен еліміздің жалғыз командасы. Ол бұл турнирде 4 ойын өткізген. Біреуін жеңіп, ал біреуінде тең түскен. Екі ойында ұтылған. Ал ағылшындық "Челси" 4 матч өткізіп, ешқайсысында жеңілмеген.

Тарихи ойынды Алматыда ұйымдастырудың өз себебі бар. Қалада жанкүйерлердің жайлылығы үшін әрі еркін қозғалысын қамтамасыз ету үшін 80 автобус қызмет етеді. Сондай-ақ ыңғайлылық үшін көлік қозғалысы да шектелген. Абай көшесінде Байтұрсынов пен Мұқанов көшелерінің аралығы және Сәтпаев көшесіндегі Байтұрсынов пен Байзақов көшелерінің аралығы жабық тұр. Ал қауіпсіздікті қамтамасыз ету үшін 2 мыңнан аса полиция қызметкері жұмысқа шыққан.

Оқи отырыңыз: "Челси" ойыншылары Алматыға келді: бүгінгі ойынды қайдан көруге болады