Қазақстандық семсерлесушілер Азия чемпионатының финалына шықты

Индонезияның Бали аралында өтіп жатқан Азия чемпионатында Қазақстан ерлер құрамасы семсер қаруымен айқасудан финалға жолдама алды, деп хабарлайды Аlmaty.tv тілшісі Оlympic.kz-ке сілтеме жасап.

Бұл сында еліміздің намысын Эльмир Әлімжанов, Вадим Шарлаимов, Ерлік Сертай және Руслан Курбанов қорғауда.

1/8 финалда команда Түрікменстаннан 45:21 есебімен басым түсті. Одан кейін қазақстандықтар Сингапурды 43:31 есебімен жеңді.

Жартылай финалда Қытайды 45:24 есебімен айқын басымдықпен ұтты.

«Алтын медаль үшін Қазақстан құрамасы Жапониямен кездеседі. Финал 21 маусымда өтеді», - делінген хабарламада.

Оқи отырыңыз: Қазақстан семсерлесуден Азия чемпионатында нешінші орын алды