Үндістанның оңтүстігіндегі көшкін құрбандарының саны 100-ден асты

Түнде Үндістанның таулы аймақтарында көшкін болды. Жергілікті халықтың басым бөлігі бөгет артында қалған. Құтқарушыларға көмекке әскерилер келді. Табиғат апатынан туристер де зардап шекті, деп хабарлайды Almaty.tv тілшісі ҚазАқпаратқа сілтеме жасап.

Үндістанның оңтүстігіндегі Керала штатында көшкін құрбандарының саны 106-ға жетті. Сейсенбі, 30 шілдеде жергілікті үкіметтің мәліметінше, тағы 100-ге жуық адам із-түзсіз жоғалған. Олардың айтуынша, құтқарылған 120-дан астам адам ауруханаға жеткізілген.

Ваянад ауданы соңғы бірнеше күн бойы толассыз жауған жаңбырдан зардап шекті. 29 шілдеге қараған түні тау баурайындағы ауылдарда жергілікті тұрғындар ұйықтап жатқанда көшкін болған. Көшкін көліктерді аударып тастаған, ағаштарды қопарып, жолдар мен көпірлерді қиратқан. Көшкін кейбір елді мекендерге кіруге тосқауыл болып тұр. Таулы шай, кофе және кардамон плантацияларында жұмыс істейтін маусымдық жұмысшылар да қоршауда қалып қойған.

Үндістан премьер-министрі Моди өтемақы төлеуге уәде берді.

Толассыз жауған нөсер құтқару жұмыстарын қиындатып отыр. Көмекке әскер, соның ішінде флот шақырылды. Үндістан премьер-министрі Нарендра Моди қаза тапқандардың отбасыларына 200 мың рупий (шамамен 2200 еуро) өтемақы, сондай-ақ зардап шеккен әрбір адам үшін 50 мың рупий (шамамен 550 еуро) төлеуге уәде берді.

Оңтүстік Керала штаты туристер арасында танымал. Жергілікті баспасөздің хабарлауынша, табиғи апат салдарынан 250 демалушы демалыс орындарының бірінде қалып қойған.

Оқи отырыңыз: Әйелін өртеп жіберген Тараз тұрғыны өзіне қол жұмсады