Қазақстан Республикасы үкіметінің қаулысымен Анатолий Валерьевич Шкарупа ҚР энергетика вице-министрі лауазымына тағайындалды. Бұған дейін аталған қызметті атқарған Бақытжан Жақсалиев лауазымынан босатылды, деп хабарлайды Аlmaty.tv тілшісі Премьер-министрдің сайтына сілтеме жасап.
Естеріңізге сала кетсек, 2018 жылдың жазында Бақытжан Жақсалиев жемқорлық істің фигуранты атанды. Ол Бурабайдағы көлді тазарту барысында қызметтік өкілеттігін асыра пайдаланды деген күдікке ілінген. Сөйтіп, бұрынғы вице-министр үй қамаққа алынды. Дәл осындай айып бойынша оның әріптесі Ғани Сәдібеков те ұсталған болатын. Тергеу мәліметінше, ол «Аймақ» ЖШС мердігерлік ұйымының басшысымен сыбайласып, Щучинск-Бурабай курорттық аумағындағы көлдерді тазартуға бөлінген бюджеттік қаражатты қымқырған.
Анатолий Шкарупа 1975 жылы Алматы облысында дүниеге келген. 1998 жылы Алматы энергетика және байланыс институтын «отын-энергетика кешені саласындағы экономика және менеджмент, инженер-экономист» мамандығы бойынша, 2016 жылы — КАЗГЮУ университетін «құқықтану» мамандығы бойынша тәмамдады.
Еңбек жолын 1998 жылы «KEGOK» ААҚ-да жетекші маман болып бастады, онда 2005 жылға дейін бөлім басшысы, Жоспарлау және экономикалық талдау департаменті директорының орынбасары қызметтерінде еңбек етті.
2005–2013 жылдары Табиғи монополияларды реттеу жөніндегі ҚР агенттігі құрылымында жұмыс істеді. Электр және жылу энергетикасы саласында реттеу департаменті директоры, Агенттік төрағасының орынбасары қызметтерін атқарған.
2013–2104 жылдары — "ТКШ жаңғырту мен дамытудың қазақстандық орталығы" АҚ басқарма төрағасы.
2015–2017 жылдары — Қарағанды облысы Саран қаласының әкімі.
2017 жылғы мамырдан бастап қазіргі таңға дейін Қарағанды облысы әкімінің орынбасары лауазымын атқарған.
