Мексикалық бапкер Головкин-Альварес қарымтасына қатысты ойын айтты

Халықаралық бокс даңқының залына енген мексикалық бапкер Игнасио «Начо» Беристайн отандасы Сауль «Канело» Альварес (50-1-2, 34 КО) пен қазақстандық Геннадий Головкин (38-1-1, 34 КО) арасындағы қарымтаның шешіміне қатысты ойын айтты, деп хабарлайды Vesti.kz.

Орта салмақта WBC, WBA (Super) және IBO белбеулері тігілген қарымта жекпе-жек 15 қыркүйекте Лас-Вегастағы T-Mobile аренасында өткен. 12 раундқа созылған жекпе-жекте төрешілер шешімімен мексикалық боксшы жеңіске жетті. Ал Головкин алғаш рет жеңілді және барлық белбеулерінен айырылды.

Беристайнның ойынша, қарымтада Альварес жақсы жұдырықтасты, алайда жеңіс Головкиндікі еді.

«Канелоның» Головкиннің алдына тұрып алғаны ұнады, бұл ерлікті мойындау керек. Бірақ меніңше, Головкин жеңді. Алғашқы жекпе-жекте күмәнім болған, алайда осы жолы көзім толық жетті. Трилогияны тамашалау жақсы болатын еді, кім мықты екенін анық білу үшін. Одан кейін төртінші жекпе-жекте болады деген ойдамын. Өйткені, көбі қалтасын ақшамен толтырғысы келеді, әсіресе Оскар Де Ла Хойя («Канелоның» промоутері). Сондықтан олар үшінші жекпе-жекке қарсы болмайды», - дейді бапкер ESPN Deportes басылымына берген сұхбатында.