Ан-28 ұшағы Қазақстан аумағында уақытша ұшпайды

Ан-28 ұшағы Қазақстан аумағында уақытша ұшпайды. Өйткені, Азаматтық авиация комитеті жуықта болған ұшақ апатының себебін анықтағанша ИСТ УИНГ әуе компаниясындағы барлық Ан-28 ұшақтарына аспанға көтерілуге тыйым салды. Естеріңізге сала кетсек, ай басында Алматы облысында АН-28 санитарлық авиация ұшағы құлаған болатын. Салдарынан, борттағы үш экипаж мүшесі мен қос білікті дәрігер өртеніп кеткен еді. Әуе кемесі Шымкенттегі халі мүшкіл келіншекке көмек көрсету үшін аттанған-ды. Бірақ, ұшақ аспанға көтерілгеніне 12 минут өтпестен, Алматы маңындағы Междуречинск ауылы түбінде апатқа ұшыраған болатын.