14 мыңнан астам мектеп бітіруші ҰБТ-ның ең төменгі межесін еңсере алмады

Биылғы Ұлттық бірыңғай тестілеуден 14 мыңнан астам түлек өте алмады. Бұл туралы брифинг барысында Ұлттық тестілеу орталығының директоры Рамазан Әлімқұлов айтты. Республикалық шараға жалпы саны 98 мыңнан аса 11-шы сынып бітіруші қатысқан. Олардың 85 пайызы, яғни 84 мыңнан астамы шекті балға қол жеткізген.

«Өкінішке қарай, шекті балды алмағандардың саны - 14 633 немесе 14%. Сондай-ақ 9 түлектің ҰБТ нәтижесі жоққа шығарылды. Қазақстан бойынша Ұлттық бірыңғай тестілеуде орташа балл - 83. Былтыр ол 80,5% болған»,-деді Ұлттық тестілеу орталығының директоры Рамазан ӘЛІМҚҰЛОВ. 

Шекті балдан аса алмаған түлектер енді 25-і шілде мен 3-і тамыз аралығында тестіні екінші рет тапсыруға өтініш беруі керек. Ал қайтара тестке отыру мезгілі тамыздың 15-і мен 19-ы  аралығында жоспарлаған. Түлек екінші ретте оң нәтиже көрсете алмаса, өз білімін қыста қайтадан сынауға мүмкіндік алады.