Алматыдағы Түрксіб ауданын электрмен жабдықтау жұмыстары қалай жүріп жатыр

Алматы әкімі Ерболат Досаев Түрксіб ауданы тұрғындарымен кездесуінде ауданды электрмен жабдықтау жұмыстары қалай жүріп жатқанын айтып берді, деп хабарлайды Almaty.tv.

"Өткен кездесуде сіздер «Шуақты», «Нұршашқан» , «Әлмерек» және «Қайрат» шағынаудандарында үнемі жарықтың сөніп қалатынын айттыңыздар. Оның негізгі себептері желілердің тозуы және қуаттың жетіспеуі болып табылады", - деді қала әкімі.

Оның айтуынша, аталған мәселелерді шешу үшін жұмыс екі бағытта жүріп жатыр.

1) Қазіргі таңда 4,2 км электр желісі  реконструкцияланды. Жылдың соңына дейін 11 км-ге дейін жеткізу жоспарланған. Осылайша, «Шуақты» және «Нұршашқан» шағынаудандардағы ескі электр желілерін жаңарту аяқталады. 2023 жылдың I-тоқсанында «Әлмерек» және «Қайрат» шағынаудандарында осындай жұмыстар басталады.

2) Қазіргі уақытта жеткілікті қуатты қамтамасыз ету үшін «Тұздыбастау» подстанциясы салынып жатыр. Объектіні 2023 жылдың II-тоқсанында пайдалануға беру жоспарланған. Содан кейін осы шағынаудандарды тұрақты электрмен қамтамасыз ету мәселесі толығымен шешілетін болады.

Бұдан басқа, осы жылдың соңына дейін әлі жарық жүргізілмеген 100 көшеде сыртқы жарық орнатылады.