Алматыдағы ботаникалық баққа аққулар оралды

Алматыдағы ботаникалық баққа аққулар оралды. Бұл туралы Алматыдағы ботаникалық бақтың ұжымы әлеуметтік желіге жазды, деп хабарлайды Almaty.tv.

Су бетінде жүзген қос аққудың видеосы бақтың желідегі парақшасына шықты.

«Олар қайтып келді. Біздің аққуларымыз сәтті қыстап, ботаникалық баққа оралғанын қуана хабарлаймыз. Ерте көктемнен кешкі күзге дейін аққулары бар тоған ботаникалық бақтың барлық қонағы үшін тартымды орынға айналады», - деп жазды бақтың ұжымы желіге.

Сонымен бірге, ботаникалық бақтың ұжымы аққулар мен балықтарды тамақтандыруға тыйым салынғанын хабарлады.

«Ботаникалық бақтағы балықтар мен аққуларды күтіп-баптау мен қоректендіруге арнайы жалданған кәсіпқойлар компаниясы жауапты. Бұл ретте күнделікті нормасы бар қатаң диета есептелген. Есіңізде болсын, нан, печенье, чипсы сияқты қажетсіз тағамдар аққулар мен балықтарды артық салмаққа, ашытуға, асқазанның бұзылуы мен басқа да денсаулық проблемаларына әкелуі мүмкін. Өсімдіктерге ғана емес, біздің үй жануарларына да қамқор болайық», - деп ескертті ботаникалық бақтың ұжымы.