Б. Сағынтаев ірі көлік жолайрықтарының құрылысын жеделдетуді тапсырды

«Әуежай айналымында» төрт және алты жолақты қозғалысы бар үш деңгейлі жолайрығының құрылысы жүруде. Бүгінде Құлжа трактісі бойындағы ұзындығы 784 м. болатын екі эстакаданың бірінің құрылысы аяқталуда. Қараша айында оның бойымен көлік қозғалысын ашу жоспарлануда, деп хабарлайды Almaty.tv.

Бұқтырма көшесі бойында 570 метрлік туннельдік өткел салынуда. Жер деңгейімен барлық оң жақты съездер, сондай-ақ «Алатау» шағын ауданы бағыты бойынша жолға шығу қарастырылған. Жолайрығы көлік ағындарының қиылысуын болдырмауға мүмкіндік береді.

Құлжа трактісі бойындағы жолайрығының көлік өткізу қабілеті 15%-ға артады. Бұқтырма көшесі бойында – 30%. Түрксіб ауданы мен Алматы облысының қала маңындағы елді мекендерінің 350 мыңға жуық тұрғынының мобильділігі артады.

Б. Сағынтаев сондай-ақ Рысқұлов даңғылы мен Емцов көшесінің бойындағы көпірден тұратын барлық бағыттағы жол айрығының құрылыс қарқынын бағалады. Эстакаданың ұзындығы – 186 метр. Жекелеген бүйірлі съездер бойынша қозғалыс ашық. Эстакада құрылысын кешіктірген соңғы 2 учаске алынып тасталды. Соның арқасында құрылыс қарқыны артты. Нысанның дайындығы – 80%.

Көлік айрығы Рысқұлов даңғылында көлік өткізу қабілетін тәулігіне 80 мың автомобильге дейін, Емцов көшесіндегі өткізу қабілетін 40 мыңға дейін арттыруға мүмкіндік береді.

Бұдан өзге, Алматы әкімі Абай даңғылын үңгілеудің барысымен танысты. Момышұлы көшесінен Наурызбай ауданының әкімшілік орталығына дейін ұзындығы 3,5 км учаске құрылысы жүріп жатыр. Әр бағытта қозғалыс үшін 3 жолақ, Әшімов көшесінің үстінен 400 метрлік эстакада, тротуарлар мен велосипед жолдарын салу қарастырылған.

Нысанның дайындығы шамамен 85%-ды құрайды. Метрополитен желісінің үстіндегі 600 метрлік учаске аяқталғаннан кейін жыл соңына қарай жаңарған даңғыл бойынша көлік қозғалысын ашу жоспарлануда.

Наурызбай ауданы Таусамалы шағын ауданындағы Қонаев көшесін реконструкциялау аяқталуда. Ұзындығы 1,2 шақырымдық жолды 2-ден 4 жолаққа дейін кеңейтеді, мұнда тротуарлар, веложолдар мен арық желісі болады. Дайындық – 90%. Асфальттың жоғарғы қабатын төсеу жұмыстары жүруде. Б. Сағынтаев жұмысты ағымдағы айдың соңына дейін аяқтауды тапсырды. Қараша айында абаттандыру үшін ағаш көшеттері отырғызылады.