Алматының қоғамдық көлік паркі 1150 жаңа автобуспен толықты

Алматының автобус парктеріне 1150 жаңа автобус  жеткізілді, деп хабарлайды Аlmaty.tv.

Бүгін Орталық коммуникациялар қызметінде Алматы әкімі Ерболат Досаевтың қатысуымен брифинг өтті. Брифинг барысында БАҚ өкілдері биыл сатып алынған жаңа 1150 автобус пен 100 троллейбус туралы сұрақ қойып, олардың барлығының жеткізілгенін  нақтылады.

Қала басшысы бұл ақпаратты растады: "Барлығы 1150 автобус болса, негізгі бөлігі желтоқсанның басында жеткізілді. Қазір қабылдау қарқынды жүріп жатыр, оның ішінде 600 автобус жергілікті бюджет қаражаты есебінен сатып алынып, 60 млрд теңге жұмсалды. Ал 550 автобус жеке тасымалдаушылар есебінен алынды. Егер Алматыда жолаушылар тасымалы туралы айтатын болсақ, онда бізде 24 тасымалдаушы, бір муниципалды "Алматыэлектротранс", қалған 23 жеке тасымалдаушы бар. Өзім жариялаған жоспарлармен келер жылы біз 1100-ден астам жаңа автобустарды бірге сатып аламыз деп үміттенемін. Бұл ретте жеке тасымалдаушылар қоғамдық көлікті экологияландыру аясында дизельді автобустарды сатып ала алмайды". Қала басшысы 32 бағыт туралы ақпаратқа да түсініктеме берді. 

- Мен бұл мәселеге ерекше назар аударамын. Қазір маршрутта 15 автобус тұр. Ал желтоқсанның соңына дейін 25 автобус болады. Аралықты 7-8 минутқа дейін қысқартамыз. Қалада біз 22 жаңа бағытты іске қостық. Алғашқы 100 троллейбусты да алдық, оның 55-і желіде, 45-і осы жылдың соңына дейін шығады. Келер жылы біз троллейбус паркін толығымен ауыстырамыз. Есептеулер бойынша жолаушылар көлігінің тиімді жұмыс істеуі және аралықтарды қысқарту үшін қалаға қосымша 800-1000 автобус сатып алу қажет. Биыл біз 1,5 млн адамды тасымалдадық, оның көлемін ұлғайтуды жоспарлап отырмыз. Қоғамдық көлік орта мерзімді перспективада Алматы қаласының  көлік құрылымына айналуы тиіс деп санаймын, - деді әкім.

Оқи отырыңыз: Алматыда автобустарды уақытша сақтау орны жойылады