Алматыда «Бюджетке қатысу» жобасындағы үздік жобаларға дауыс беру басталды

Алматыда «Бюджетке қатысу» жобасындағы үздік  жобаларға дауыс беру басталды, деп хабарлайды Almaty.tv.

Ұйымдастырушылар алматылықтар өзі қалаған жобаға көбіне онлайн дауыс беріп жатқанын айтады. Ал жәшікке дауыс тастауға келгендер жоқ. Мамандар әзірге Алатау мен Медеу ауданының тұрғындары белсенді атсалысып жатыр дейді. Ескерте кетейік, биыл екі жолмен дауыс беруге болады. Яғни, сайт арқылы немесе қағаз түрінде.

«Барлық алматылықтарды өздері ұсынған жобаны белсенді қолдауға шақырамыз. Өйткені тек сонда ғана ол жүзеге асады. Оның үстіне бұл жобалар қаланы гүлдентуге, ауланы көркейтуге, бос жатқан аумақтарды демалыс орнына айналдыруға, гүлзар мен саябақтар санын көбейтуге бағытталған. Егер өзіңізге онлайн дауыс беру ыңғайлы болса онда «Бюджетке қатысу» жобасының сайтына кіру қажет. Онда дауыс беру өте оңай», – деді Алматы қаласын дамыту орталығының департамент директоры Әлия Жақсылықова.

Дауыс беру 23-і қараша күні аяқталса, 24-і күні мамандар кіл мықты атанған идеяларды іріктейді. «Бюджетке қатысу» жобасында қалада тіркеуі бар тұрғындар бас-аяғы 3 жобаға өз дауысын бере алады. Ал жоба жүзеге асу үшін 10 баллдан аса жинау керек. Сонда ғана идея қаржылай қолдау табады.