Алматыда 10 мыңға жуық тұрғын қатысқан жергілікті сенбіліктер өтті

Алматыда «Таза Қазақстан» республикалық бастамасы аясында «Мөлдір бұлақ» экологиялық акциясы өтті, деп хабарлайды Almaty.tv.

Аталған іс-шара қаланың санитарлық жағдайын жақсартуға, аумақты көркейтуге және тұрғындар арасында экологиялық мәдениетті қалыптастыруға бағытталды. Бұл туралы қалалық коммуналдық инфрақұрылым және тұрғын үй инспекциясы басқармасының өкілдері хабарлады.

2026 жылы 18 сәуірде қаланың сегіз ауданында орналасқан 15 учаскеде бір мезетте жергілікті сенбілік ұйымдастырылды. Ауқымды тазалық жұмыстарына 9440 адам қатысып, 254 бірлік арнайы техника жұмылдырылды.

Соның арқасында қала аумағынан 1777 текше метр қоқыс пен қалдық шығарылды. Сонымен қатар, акция аясында ағаш егу жұмыстары жүргізіліп, бұл қаланың жасыл қорын толықтыруға үлес қосты.

Тазалық жұмыстары Үлкен және Кіші Алматы, Жарбұлақ және Қарасу өзендерінің жағалауларын, сондай-ақ аулалар мен қоғамдық кеңістіктерді қамтыды. Әсіресе, Әуезов ауданында қатысушылар көп, онда сенбілікке 2,5 мың адам қатысты.

Акция қала инфрақұрылымының едәуір бөлігін ретке келтіруге мүмкіндік беріп қана қоймай, тұрғындардың экология мен көріктендіру мәселесіне деген белсенділігін арттырды.

Оқи отырыңыз: Алматыда Карьерная көшесінде тұрғындар мен коммуналдық қызмет өкілдерінің қатысуымен сенбілік өтті