Алматыда демалыс күндері өтетін жәрмеңкелер үш күндік жұмыс форматына көшеді

Жаңа жылға дейін Әуезов және Бостандық аудандарында демалыс күндері өтетін жәрмеңкелер кеңейтілген форматта — жұма, сенбі және жексенбі күндері жұмыс істейді, деп хабарлайды Аlmaty.tv.

Үш күндік жұмыс режиміне көшу қала тұрғындары мен қонақтарына ыңғайлы уақытта 1 000-нан астам өнім түрін, оның ішінде көкөніс, жеміс-жидек, ет және сүт өнімін, сондай-ақ әлеуметтік маңызы бар азық-түлік тауарын тиімді бағамен сатып алуға мүмкіндік береді. Әсіресе бұл мереке күндері қарсаңында маңызды.

Қаланың басқа ауданында жәрмеңкелер бұрынғыдай екі күндік форматта жұмысын жалғастырады. Жәрмеңкелер өтетін мекенжайлар:

• Әуезов ауданы — Өтеген батыр көшесі (Абай даңғылынан төмен);
• Бостандық ауданы — «Қазақфильм» шағынауданы (әл-Фараби даңғылынан жоғары);
• Алмалы ауданы — Масанчи көшесі (Әйтеке би және Гоголь көшелерінің арасы);
• Алмалы ауданы — Жамбыл және Әуезов көшелерінің қиылысы;
• Медеу ауданы — Меңдіқұлов бульвары — Бектұров көшесі;
• Жетісу ауданы — Құлагер шағынауданы, Серіков көшесі, 2.

Демалыс күндері өтетін жәрмеңкелерге апта сайын шамамен 50 мың адам келеді. Мұнда 328 фермер мен ауыл шаруашылығы тауарын өндіруші өнімін ұсынады.

Жыл басынан бері жәрмеңкелер арқылы жалпы көлемі 8,8 мың тоннадан астам азық-түлік өнімі сатылды.

Оқи отырыңыз: Алматыда заңсыз салынған базар сүріліп жатыр