Алматының Бас жоспарын әзірлеушілер не үшін БРТ қажет екенін түсіндірді

Алматыда қаланың 2040 жылға дейінгі Бас жоспарын түзетуге арналған қоғамдық тыңдаулар барысында тұрғындар көлік жүктемесіне қатысты, атап айтқанда, әл-Фараби даңғылындағы тұрақты кептеліс пен БРТ желісін дамыту тиімділігі туралы сұрақтар қойды, деп хабарлайды Almaty.tv.

«Алматыбасжоспар» ғылыми-зерттеу институтының директоры Асхат Сәдуов жаңа Бас жоспарда қандай шешімдер қарастырылғанын және неге қоғамдық көлікке басымдық бермей кептеліс мәселесін шешу мүмкін еместігін түсіндірді. 

Асхат Сәдуовтың айтуынша, жаңа Бас жоспардың негізгі бағытының бірі кептеліс пен экология мәселесін шешудің негізгі құралы ретінде қоғамдық көлікті дамыту болмақ.

«Егер біз қаланы дамыту мен экологиялық жағдайды жақсартқымыз келсе, қоғамдық көлікке отыруымыз керек. Қазір көпшілік жүргізуші көзқарасымен қарайды, бірақ қалаға қоғамдық көлікке басымдық беретін түбегейлі қадам қажет. Сонда ғана кептеліс мәселесін азайта аламыз», – деді ол.

Желтоқсан көшесіне қатысты қойылған сұрақтарға жауап бере отырып, институт басшысы бұл көше жалпы көлік сызбасының бір бөлігі ретінде қарастырылатынын айтты. Желтоқсан көшесіндегі аумақ Тимирязев көшесі бойындағы BRT желісінің жалғасы ретінде қарастырылып отыр.
  
Сондай-ақ ол әл-Фараби даңғылындағы жағдайға жеке тоқталды. Бұл көше ұзақ уақыт бойы «жылдам» әрі бос көлік дәлізі ретінде саналып келген.

«Көпшілік әл-Фарабиде жылдамдық 80 км/сағ, бағдаршам жоқ деп, сол бағытқа ұмтылады. Басында бұл жүйе жұмыс істеді, бірақ кейін сұраныстың артуы кептеліске алып келді, бүгінде бұл көшеде үнемі кептеліс бар», – деді Асхат Сәдуов.

Оның айтуынша, мұндай жағдай басқа мегаполистерде де байқалған.

«Мәскеу мен Мәскеу қаласының айналма автожолының тәжірибесі көрсеткендей, бос көлік дәлізі пайда болған сәтте барлығы сол бағытқа ағылады. Әл-Фараби даңғылы да бүгінде осы мәселені бастан кешіп отыр. Жалғыз шешім – қоғамдық көлікті дамыту. Біз осы ұстанымды ұстанамыз», – деп сөзін түйіндеді институт директоры.

Қала басқарушы ретінде Асхат Сәдуов әл-Фараби даңғылындағы қозғалысты ұйымдастыруға қатысты тәсілдерді өзгерту қажет екенін айтты.

«Жеке пікірім – әл-Фарабиге бағдаршам орнату керек. Қазір бұл көшені «адамдарға ыңғайлы ету» жоспары әзірленіп жатыр. Көптеген елдегідей, болашақта бұл жерде жылдам жүретін қоғамдық көлік дәліздері пайда болуы да мүмкін», – деді Сәдуов.

Алматының 2040 жылға дейінгі Бас жоспарын түзету бойынша қоғамдық тыңдаулар жалғасып жатыр. Қала тұрғындарының ұсынысы мен ескертуі құжатты жетілдіру кезінде ескеріледі.

Оқи отырыңыз: Қызылорда облысындағы ауылда табиғи газ қосылды