«Эко-Трак» қалалық жастар фестиваліндегі экологиялық акцияға қатысты

Алматыда ALMA LOVE 2026 жастар фестивалі аясында экологиялық акция өтті. Қорытынды концерт кезінде фестиваль алаңында «Эко-Трак» жұмыс істеді. Бұл Алматыдағы ECO Network және «Эко-Хаб» жобаларының негізін қалаушы Евгений Мухамеджановтың бастамасымен құрылған, қаладағы алғашқы жылжымалы интерактивті экологиялық зертхана. Жоба бөлек жиналған қалдықтарды қабылдауды экологиялық ағартумен ұштастырады. Бұл туралы «Eco Almaty» ЖШС өкілдері хабарлады, - деп хабарлайды Аlmaty.tv.

Акцияға қатысушыларға қалдықтарды бөлек жинау жүйесінің қалай жұмыс істейтіні іс жүзінде көрсетілді: қалдықтар фракциялар бойынша сұрыпталды, ал пластик қақпақтар арнайы шредерде ұсақталып, кейін қайта өңдеуге жіберілетін шикізатқа айналдырылды.

Алайда экологиялық бастама концерт аяқталғаннан кейін де жалғасты. Қонақтар мен қатысушылардан аумақты жинап, артынан қоқыс қалдырмау — мыңдаған адам жаңа ғана пайдаланған кеңістіктің тазалығын сақтау сұралды.

ALMA LOVE 2026 — Халықаралық жастар күніне орай ұйымдастырылған қалалық жастар фестивалі. Он күн ішінде фестиваль Алматының 20 мыңнан астам жастарын біріктіріп, мәдениет, білім беру, спорт, экология және қоғамдық бағыттар бойынша 50-ден астам іс-шараны қамтыды.

Оқи отырыңыз: Алматыда жексенбі күні Gran Fondo World Championship жарысына байланысты Әл-Фараби даңғылында көлік қозғалысы уақытша шектеледі