Елімізде ауыл шаруашылығына жұмсалатын су тиімді пайдаланылып жатыр ма

Мәжілісте Жоғары аудиторлық палатаның төрайымы Наталья Годунова су ресурстарының басқарылу тиімділігіне жүргізілген аудиторлық іс-шараның қорытындысын таныстырды, деп хабарлайды Аlmaty.tv тілшісі inform.kz-ке сілтеме жасап. 

- Өзге елдермен салыстырғанда біз іс жүзінде су үнемдеу технологияларын қолданбаймыз немесе өте сирек қолданамыз. Ескі каналдар мен тозығы жеткен желілерде ысырап болып жатқан судың көлемі өте көп. Біз есептедік. 2022 жылы ауыл шаруашылығында ғана ысырап болған судың көлемі 5,2 текше шақырым болған. Бұл салаға алынған судың 45 пайызы деген сөз, – деді Наталья Годунова.

Наталья Годунова бұл шығынды жойса, трансшекаралық өзендерге тәуелділіктен арылуға болатынын айтады.

- Ал трансшекаралық өзендер арқылы сырттан келетін судың тапшылығы былтыр 0,8 текше шақырым болған. Осыдан-ақ су үнемдеу технологиясын жаппай енгізу арқылы трансшекаралық өзендерден келетін судың тапшылығын қалай жабуға болатынын өздеріңіз де бағалай аласыздар, – деді Жоғары аудиторлық палата басшысы.

Оқи отырыңыз: Биыл 25 студенттер жатақханасы пайдалануға берілді