Қазақстанда маска кию режимін бұзған үшін салынатын айыппұл мөлшері азаяды

Қазақстанда бетперде кию режимін бұзғаны үшін салынатын айыппұл мөлшерін 83 мың теңгеден 2 778 теңгеге дейін азайту ұсынылып отыр. Бұл туралы кәсіпкерлерінің құқығын қорғау жөніндегі уәкіл Рустам Жүрсінов хабарлады,деп хабарлайды Almaty.tv тілшісі Sputnik Қазақстанға сілтеме жасап.

«Қазіргі кезде мемлекеттік органдар "Қазақстан Республикасының Әкімшілік құқық бұзушылық туралы кодекске өзгерістер мен толықтырулар енгізу туралы" заң жобасының тұжырымдамасын қарастырып жатыр. Соның аясында жеке тұлғалар үшін бептерде кимегені үшін салынатын айыппұлды 30 айлық есептік көрсеткіштен 1 АЕК-ке (2 778 теңге) дейін төмендету ұсынылып отыр. Біз осы жұмысқа белсенді атсалысудамыз», – деп жазды Жүрсінов әлеуметтік желідегі парақшасында.

Бизнес-омбудсмен кәсіпкерлік нысандарда бетпердені киюге қатысты салынатын айыппұл мәселесіне де тоқталды. Оның айтуынша, кәсіпкер өз тарапынан барлық санитарлық норманы сақтап, бетперде мен қолғаптың қажетті көлемін әзірлеп қойса, қызметкерлері мен тұтынушылардың талапты бұзғаны үшін жауап бермеуі керек. Айыппұл бетперде кимеген адамға ғана салынуы шарт.

Денсаулық сақтау министрлігінің санитарлық-эпидимиологиялық қызметі де мұны құптап отыр. Жүрсінов өзіне ресми жауап келгенін айтты. Оған сәйкес, кәсіпкерлік нысанда бетперде тақпаған қызметкер немесе клиент анықталса, әрбір тәртіп бұзушылық жеке-дара қарастырылады. Ал айыппұл талапты бұзған адамға салынатын болады.

Денсаулық сақтау министрлігінің ресми өкілі Бағдат Қожахметов 5 шілдеден бастап қоғамдық орындарда маска тақпаған екі жарым мың қазақстандыққа айыппұл салынғанын хабарлаған болатын.