Коронавирус: Алматылық медицина қызметкерлеріне 1,6 млрд теңге үстемеақы төленді

Алматы қаласында коронавирус эпидемиясына қарсы күрес шараларына 9 миллиард теңгеге жуық қаржы бөлінген, деп хабарлайды Almaty.tv тілшісі ҚазАқпаратқа сілтеме жасап.

Бастапқы жоспар бойынша оның 5,5 миллиард теңгеден астамы коронавирусқа қарсы күресіп жатқан денсаулық сақтау саласы қызметкерлеріне қосымша үстемеақы ретінде төленуі тиіс болатын. 

«Қазіргі таңда үстемеақыға бөлінген сома біршама артып, 6,68 млрд теңгеге жетті. Бұған ауруханаларда ашылған қосымша төсек-орын саны мен коронавирусқа қарсы күреске жұмылдырылған қызметкерлерге төленетін соманың артуы түрткі болып отыр», – деді «Әлеуметтік медициналық сақтандыру қоры» КЕАҚ Алматы қалалық филиалының директоры Тілеухан Әбілдаев. 

Ресми мәліметке сүйенсек, вирусқа қарсы күреске қатысып жатқан медицина нысандарының тізімін Алматы әкімдігіндегі арнайы комиссия бекіткен. Бекітілген тізімге сәйкес, наурыз-мамыр айларында медицина мамандарына 4,3 млрд теңгеге жуық қаражат төленді. 

Қауіп деңгейі аса жоғары 1-топқа – 1,6 млрд теңге; 

Қауіп деңгейі жоғары 2-топқа – 1,9 млрд теңгеден астам; 

Қауіп деңгейі орташа 3-топқа – 689 млн теңгеден астам үстемеақы берілді. 

Филиал мәліметінше, маусым айында Алматы бойынша 5441 медицина маманы 1,8 млрд теңгеден астам үстемеақы алады. Оның ішінде: 

Қауіп деңгейі аса жоғары 1-топтағы 1407 маман – 871,1 млн теңге; 

Қауіп деңгейі жоғары 2-топқа жататын 2498 адам – 710,2 млн теңге;

Қауіп деңгейі орташа 3-топқа жататын 1536 адам – 227,5 млн теңге көлемінде үстемеақы алды. 

«Қазіргі таңда 1,0 млрд теңге көлемінде қосымша үстемақы төленді. Оның 608,8 млн теңгесі жедел жәрдем қызметіне тиесілі. Сонымен қатар, инфекциялық, провизорлық және карантиндік төсек-орын ұйымдастырылған стационарлар, емхана қызметкерлеріне (фильтрлер, 4-санаттағы жедел жәрдем шақыртулары, лаборанттардан құралған мобильді бригадалар) 1,2 млрд теңге төленді. Жалпы алғанда, 913 дәрігер, 2677 орта буын медицина қызметкері, 980 кіші персонал, өзге де 871 қызметкер (соның ішінде жедел жәрдем қызметінің 803 жүргізушісі) үстемеақы алды», – деді Тілеухан Әбілдаев. 

Оның айтуынша, қазіргі таңда қалада эпидемияға қарсы іс-шараларға 92 денсаулық сақтау нысаны жұмылдырылған, оның 74-і – емхана. Естеріңізге сала кетсек, қосымша төлемдер денсаулық сақтау саласы қызметкерінің өміріне төндіретін қауіп деңгейіне қарай төленеді.

Біріншісі – қауіп деңгейі аса жоғары топ. Оған инфекциялық стационарлар мен жансақтау бөлімдерінің дәрігерлері, аға және орта буын медицина қызметкерлері жатады. 

Екіншісі – қауіп деңгейі жоғары топ. Оған провизорлық стационарларда жұмыс істейтін мамандар, жедел медициналық жәрдем, санитарлық авиация қызметінің дәрігерлері мен фельдшерлері кіреді. 

Үшіншісі – қауіп деңгейі орташа топ. Оған карантиндік стационарлардың дәрігерлері, орта және кіші медицина қызметкерлері, санитарлық дәрігерлер (мемлекеттік қызметкерлер), жедел жәрдем көлігінің жүргізушілері жатады.