Атырау облысында аудан әкімі суға батып кетті

Атырау облысы Махамбет ауданының әкімі Жайық өзеніне батып кетті, деп хабарлайды Almaty.tv тілшісі ҚазАқпаратқа сілтеме жасап.

Бұл деректі Махамбет ауданының әкімдігі мен облыстық төтенше жағдайлар департаментінің қоғаммен байланыс тобы растады.

Оқыс оқиға туралы  хабар департаменттің диспетчер пультіне 31 шілдеде жергілікті уақытпен сағат 22:38-де жеткен.

Махамбет ауданының әкімі Ринат Жанқылыш Ортақшыл ауылының тұсында Жайық өзеніне суға түскен. Бірақ судан қайта шықпаған.

Оқиға орнына департаменттің жедел құтқару жасағынан 3 сүңгуір жіберіліп, іздеу жұмысына кірісті.

Ринат Жанқылыш Махамбет ауданының әкімі лауазымына 2021 жылы ақпанда тағайындалған болатын.

Ол 1982 жылы 2 желтоқсанда Атырау қаласында туған.

Жоғары білімді 2003 жылы Қазақ мемлекеттік заң университетінде, 2011 жылы Жамбыл гуманитарлық-техникалық университетінде, ал 2017 жылы Атырау мұнай-газ университетінде заңгер, экономист және мұнай-газ ісі мамандығы бойынша алған.

Еңбек жолын 2005 жылы Алматы қалалық экономикалық және сыбайлас жемқорлыққа қарсы күрес департаментінде тергеуші болып бастаған. 2006-2018 жылдары бірнеше жеке кәсіпорында басшылық еткен. Ал, 2018-2019 жылдары Атырау қаласы мәслихатының хатшысы, 2019-2020 жылдары Атырау қаласы әкімінің орынбасары лауазымын атқарған.