Жасөспірімді құтқарған полиция қызметкері жарақат алды (видео)

Семейде полицейлер жасөспірімді аңдыған ер адамды қолға түсірді, күдікті тәртіп сақшысына пышақ жарақатын салды, деп хабарлайды Аlmaty.tv тілшісі Polisia.kz-ке сілтеме жасап.  29 ақпан түстен кейінгі уақытта, полицейлер 13 жастағы қыздан белгісіз ер адам оны соңынан қуып жүргені туралы хабарлама алды. “102” операторына бойжеткен сыртқа шығуға қорқып, дүкенде күтетінін айтты. Дереу учаскелік полиция инспекторлары шақыруға жіберілді, олар супермаркеттің жанынан күдікті адамды байқап, мән-жайларды анықтауға тырысқан, бірақ жігіт қолындағы пышағымен, тәртіп сақшыларына қарай жүгірген. Учаскелік полицейлер ер адамның дүкеннен кетуі керек екенін түсінді, өйткені ол маңда адамдар болып, зияны тиіп кетуі мүмкін. Агрессивті ер адамның назарын аударып, полицейлер рациямен көмек сұрады, патрульдік полиция экипажы дереу оқиға орнына келді. Заңсыз әрекеттердің жолын кесу үшін қызметтік көліктен шыққан кезде патрульдік полицей Асхат Ахатовқа күдікті пышақ жарақатын салған. Осыған қарамастан, жараланған қызметкер әріптестерімен бірге жекпе-жек әдістерін қолданып, қылмыскерді ұстады. Басынан үш рет жарақат алған полиция қызметкері ауруханаға жеткізіліп, оған медициналық көмек көрсетілді. Қазіргі уақытта күдікті уақытша ұстау изоляторына қамалды, оған қатысты полиция қызметкерінің өміріне қол сұғу фактісі бойынша қылмыстық іс қозғалды.

Оқи отырыңыз: БҚО-да күйеуін киллер жалдап өлтірмек болған келіншек ұсталды