ШҚО-да мектеп есепшісі 12 млн теңге жымқырып, құмар ойындарға жұмсаған

Шығыс Қазақстан облысы Күршім ауданында мектеп есепшісі 12 миллион теңге жымқырып, құмар ойындарға жұмсаған, деп хабарлайды Almaty.tv тілшісі ҚазАқпаратқа сілтеме жасап.

Аудандық соттың мәліметіне сүйенсек, Күршімдегі орта мектептің бірінде есепші болып жұмыс істеген ер адам 2018 жылдың қаңтарынан 2022 жылдың шілдесіне дейін ақша жымқырып келді.

Ол қаражатты өзінің банк картасына және мектепте жұмыс істемейтін туыстарының шотына аударып отырды. Келген материалдық шығын – 11,9 миллион теңге.

«Айыпталушының кінәсі сот-экономикалық сараптаманың қорытындысымен, куәгерлердің сөзімен дәлелденді. Сотталушы да өз кінәсін толықтай мойындады. Ер адам ақшаны құмар ойындарға және несиесін өтеуге жұмсаған», – деп хабарлады Күршім аудандық сотының баспасөз қызметі.

Сот шешімімен ер адам мемлекеттік қызметте лауазым атқару құқығынан өмір бойына айырылып, үш жарым жылға түрмеге қамалды.

Үкім әлі заңды күшіне енген жоқ.