Қандала емес, балалар уланды: Ақтауда қос білдіршін көз жұмды

Ақтауда қос бүлдіршіннің өліміне себепші болған адам жауапқа тартылады. Пәтерінде улау тәртібін сақтамай жәндіктерді заласыздандырмақ болған көршіге қатысты қылмыстық іс қозғалды, деп хабарлайды Almaty.tv тілшісі.

Нұрсәуле Түменова – марқұм болған қос бүлдіршіннің туысы. Осыдан 2 күн бұрын түнде отбасы мүшелері жайсыз сезініп жатқанын айтып қоңырау шалған. Жақындары жедел жәрдем шақырыңдар деп кеңес береді. Таңға жуық 10 айлық және 2 жасар бала көз жұмған. Олардың белгісіз иістен уланып қалғанын сол кезде біліпті. Ал төменгі қабаттағы тұрғын қанадаланы өз бетінше улап, көршілерін ескертпей, кетіп қалған.

– Жиен келінім «апа, балалардан айырылып қалдым» деп таңертең хабарласты. Бүгін жаназасы болды. Біздің талабымыз - әділ сот, әділ шешім. Көршілер үндемей есігін кілттеп кетіп қалмай, ескертуі керек еді, – деді туысы Нұрсәуле Түменова.

Қайғылы оқиға №7 шағынауданындағы 14 үйінде болған. Жедел жәрдем екі баланың өлімінен кейін қалған 5 адамды ауруханаға жеткізген. Олар: 2015 және 2017 жылы туған балалар. Біреуінің жағдайы әлі де ауыр деп хабарлайды.

– Антидонт салып, дезинфекациялық терапия жүргізілді. Қазіргі таңда балалардың жағдайы орташа ауырлықта. Консилиум болады, бөлімшеге ауыстыру жоспарланып отыр. Қыз баланың жағдайы тұрақты, – деді Маңғыстау облыстық көпбейінді балалар ауруханасының бөлім меңгерушісі Мереке Бекбаев.

Бұл жағдай бойынша қаладағы бірнеше қызмет дереу жиналып, баспасөз конференциясын өткізді. Осыған дейін де 4 жағдай тіркелген. Ал жәндіктерді улаған пәтер иесі жарнамаға сеніп, улы затты базардан сатып алғанын жеткізді. Оның үйінен белгісіз дәрінің 39 данасы табылған.

– Эпидемиологиялық тексеру барысында сараптама уланған пәтер ішінде аммиак қышқылы мен көмірсу оксидінің шамадан тыс болғанын көрсетті. Олар улы газ бөліп, соның салдарынан отбасы уланып қалған. Препараттардың шыққан жері, құрамы белгісіз, – деді қалалық санитарлық-эпидемиологиялық бақылау басқармасының басшысы Асима Жарылғасова.

– ҚР ҚК 304-бабы 3-бөлігі бойынша қылмыстық іс тіркелді. Қажетті сараптамалар тағайындалды. Сараптама қорытындысымен нақты шешім қабылданады. Улаған көршісі жауап береді, – деді  Маңғыстау облысы полиция департаменті ергеу басқармасының бастығы Нұралин Баржиков.

Қандаланы улаймын деп екі баланың өліміне себепші болған адамға енді 5-10 жыл аралығында бас бостандығынан айыру жазасы көзделген.

Жазира Қуанышбекқызы, Мұқағали Нұрдәулет, «Алматы» телеарнасы, Ақтау