Алматы облысында жыл басынан бері 130-дан астам қылмыскер ұсталған

Алматы облысының полицейлері жыл басынан бері 131 қылмыскерді ұстады, деп хабарлайды Аlmaty.tv тілшісі Polisia.kz-ке сілтеме жасап.

Қылмыскерлерді іздеу – жедел уәкілдің басты міндеттерінің бірі. Заңды бұзған адамдар жазадан құтылу үмітімен қашады.   

«Заң сызығынан аттаған адамдарды іздеумен қатар, жедел уәкілдер із-түзсіз жоғалған адамдарды іздеумен айналысады. Криминалдық полиция қызметкерлерімен бірге әрбір дерек бойынша учаскелік инспекторлар мен патрульдік полицейлер жұмылдырылып, бағдарлар полицияның кешенді күштеріне жолданады. Жыл басынан бері хабар-ошарсыз кеткен 82 адам табылды», – деп атап өтті Алматы облысы ПД КПБ бастығы Руслан Смағұлов.

Полициядан басқа, хабар-ошарсыз кеткендерді іздеуге еріктілер қозғалысының өкілдері қосылады.

«Еріктілер үлкен көмек көрсетеді, әсіресе «LIDER.KZ» іздеу жасағының жұмысын атап өткім келеді, олар күндіз де, түнде де байланыста. Хабар-ошарсыз кеткен адамдардың көбісі олардың тікелей жәрдемімен табылады», – деп толықтырды Р. Смағұлов.

Егер адам жоғалып кетсе, таныстарына, достарына және туыстарына дереу қоңырау шалу керек. Қандай да бір ақпарат болмаған жағдайда, жоғалған адамның соңғы белгілі болған жері бойынша полиция бөліміне немесе жақын жердегі полиция бөліміне дереу хабарласу қажет.

Оқи отырыңыз: Қазақстанда 2,5 мыңнан астам киберқылмыс ашылған