Наурызбай ауданында жаңа емханалар салынады

Бұл туралы Алматы әкімі Ерболат Досаев Наурызбай ауданы тұрғындарымен кездесуінде мәлімдеді, деп хабарлайды Almaty.tv.

"Ауданда, әсіресе жоғарғы бөлігінде емханалардың жетіспеу мәселесі өзекті болып тұр. Аудан халқының жыл сайын 10-12 мың адамға өсетінін ескере отырып, қала әкімдігі 2 жаңа емхана және 1 отбасы-дәрігерлік амбулатория салуды жоспарлап отыр", -деді мегаполис басшысы.

Бүгінгі күні Құрамыс шағынауданында 500 келушіге арналған емхананың жобалау-сметалық құжаттамасы әзірленді. 2023 жылдың қаңтарында мемлекеттік сараптаманың оң қорытындысын алу, 2023 жылдың II-тоқсанында құрылыс-монтаждау жұмыстарын бастау жоспарланған.

Шұғыла шағынауданында 500 келушіге арналған жаңа емхана салу үшін жер учаскесін ресімдеу және жобалау-сметалық құжаттаманы әзірлеуге конкурс жариялау үшін құжаттама дайындалып жатыр.

"Сондай-ақ, осы жылдың соңына дейін Ақжар шағынауданында 200 келушіге арналған 1 дәрігерлік амбулаторияның жобалау-сметалық құжаттамасын әзірлеу аяқталады, қазіргі уақытта ол мемлекеттік сараптаманың қарауында. Құрылысты мемлекеттік сараптаманың оң қорытындысын алып, конкурстық процедураларды өткізгеннен кейін 2023 жылдың II-тоқсанында бастау жоспарланған", - деп мәлімдеді әкім.