Алматыда мектептер мен колледждерде сабақ болмайды

Алматы қаласының Білім басқармасы мәлімдеме жасады, деп хабарлайды Almaty.tv.

Қаладағы қауіпсіздікті қамтамасыз ету үшін мектептер мен оқу орындары бүгін жұмысын тоқтатты.

Ал балабақшадағы бүлдіршіндерді ата-аналары қалауы бойынша алып кете алады. Алматы полициясы да күшейтілген режимге көшті. Қоғамдық тәртіпті 2 мыңнан астам адам қамтамасыз етуде. Шошынған халық бұл жолы сілкіністің қуатты болғанын растап отыр. Басым бөлігі абыр-сабырға берілмей, ережелерді сақтаған.

– Астымыздан біреу тарс етіп, ұрғандай болды. Үлгеріп, бәрін алдық та, далаға шығып, киініп алдым. Қашып шықтық, – деді қала тұрғыны Нұрғали Сатымбеков.

– Дабыл чемоданына бүкіл документі, керекті заттарды жинап қойғанбыз. Соларды алып бәріміз сыртқа шықтық, – деді қала тұрғыны Әмірхан Даниал.

– Менің жүрегім дүрсілдеп, басым айналып кетті. Алдында ондай болған жоқ, – деді қала тұрғыны Кәкен Бексүгірова.

Қалада қылмыстың алдын алу бойынша профилактикалық іс-шаралар жүргізілді. Алматы полициясы жүргізушілерді жол қозғалысы ережелерін қатаң сақтауға шақырады. Қазір Алматы халықаралық әуежайы да қалыпты режимде жұмыс істеп жатыр. Әуежайда ұшу жолағы мен перрондардың зақымданбағаны хабарланды.

Оқи отырыңыз: Алматы метрополитені үш сағат көлемінде қайта іске қосылады