Ақпарат министрлігі шетелдік онлайн платформалар мен мессенджерлер жұмысын шектей алады

ҚР Үкіметі 2022 жылғы 22 шілдедегі Ақпарат және қоғамдық даму министрлігінің өкілеттіктеріне өзгерістер енгізетін қаулыға қол қойды, деп хабарлайды Almaty.tv тілшісі Zakon.kz сайтына сілтеме жасап.

Енгізілген түзетулерге сәйкес Ақпарат және қоғамдық даму министрлігі жаңа өкілеттіктер алады. Оның ішінде мессенджерлер мен әлеуметтік желілерді бұғаттау да бар.

Осылайша онлайн платформа немесе жедел хабар алмасу қызметін пайдаланушылар саны туралы ақпаратты тексеру үшін министрлік онлайн-платформадан немесе жедел хабар алмасу қызметінен тәуліктік пайдаланушылар саны туралы ақпаратты сұрай алатын болады. Егер онлайн платформа немесе жедел хабар алмасу қызметі интернеттегі ақпараттық ресурсты пайдаланушылар санын анықтауға арналған бағдарламаны орнатпайтын болса, онда министрлік өз ресурсын пайдаланып, пайдаланушылар санын анықтай алады.

Бұдан өзге министрліктің өкілеттіктері:

• республиканың заңнамасына сәйкес Қазақстан аумағында шетелдік онлайн-платформаның немесе жедел хабар алмасу қызметінің қызметін шектеуге;
• қылмыстық жолмен алынған кірістерді заңдастыруға (жылыстатуға), терроризмді қаржыландыруға қарсы іс-қимыл саласындағы уәкілетті органға осындай ақпаратты ұсына отырып, коммерциялық емес ұйымдардың терроризмді қаржыландыру тәуекелдерін анықтау жөніндегі қызметіне талдау және мониторинг жүргізу;
• сараптама тобын құру қағидаларын әзірлеу және бекіту, сонымен бірге балаға қатысты киберқорлау фактілері бойынша өтініштерді қарау;
• телекоммуникация желілеріндегі Қазақстан заңнамасының талаптарын сақтау мәселелері бойынша мемлекеттік органдардың өзара іс-қимылы қағидаларын әзірлейді және бекітеді;
• байланыс операторларына, онлайн платформалардың иелеріне немесе заңды өкілдеріне, сонымен бірге мемлекеттік техникалық қызметке интернет-ресурсқа қолжетімділікті қалпына келтіруге нұсқау беру;
• шетелдік онлайн платформалар мен жедел хабар алмасу қызметтерінің заңды өкілдерінің тізілімін жүргізу;
• шетелдік онлайн платформалар мен жедел хабар алмасу қызметтерінің заңды өкілдерінің тізілімін жүргізу қағидаларын әзірлеу және бекіту.

Қаулы бірнеше тармақтарды санамағанда, қол қойылған күнінен бастап күшіне енеді.