Алматыда 121 көшенің 140 шақырымдық сыртқы жарықтандыру желісі аяқталды

Наурызбай және Алатау аудандарында көше шамдары  қойылды.  Соңғы екі айда бұл аудандарда орнатылған жарық шамдарының саны 15-ке жеткен, деп хабарлайды Almaty.tv тілшісі.

«Алты Алаш» ықшамауданының 11  көшесінде сыртқы жарықтандыру жұмыстары жүргізілсе, қазіргі таңда Қалқаман ықшамауданындағы  12 көшеге түнгі шамдар қойылып жатыр. Наурызбай ауданының әкімдігі алдағы 3 жылдың ішінде қалған 245 көшені толығымен жарықтандырамыз деді. Жыл басынан бері Алматыда 140 шақырым сыртқы жарықтандыру желісінің құрылысы аяқталды.  Алатау, Әуезов, Жетісу, Медеу және Наурызбай аудандарының аумақтарында  LED-шамдар орнатылды.

«Алатау ауданында жалпы 730 көше бар. Оның 262-і жарықпен толық қамтамасыз етілген. 2019 жылға Алатау ауданы бойынша 65 көшеге көше жарықшамдары орнатылады деген жоспарымыз бар. Қазіргі уақытта ақшасы бөлініп қойды. Нақты «Әйгерім» ықшамауданы бойынша 23 көшеге көше жарықтары орнатылатын болады», – деді Алматы  қаласы  Алатау ауданы көріктендіру бөлімінің бас маманы Нұрсұлтан МЫРЗАТАЙ.

Қала әкімі Бақытжан Сағынтаев  тұрғындар тарапынан  айтылған мәселелердің оң шешім табуын тұрақты қадағалап, басты назарда ұстайды.